強記小廚's 飯堂

未得到世界需賠上生命麼？

Sun, 18 Sep 2011 14:52:47 +0000

對國內的ＩＴ界名人傳奇毫不興趣，一黎每個名人主角都是一樣性格：內向、聰明、有自信但和藹、低調又謙恭，好似馬雲、丁磊、柳傳志同馬化騰都係同一個人咁。二黎對佢地創業模式不大認同。但最近有本新書，講丁磊的網易，令我有些感慨。而感慨的人是曾在丁磊下台而網易正被停牌的困難時刻，走馬上任的代理CEO孫德棣先生。
佢勞心奮力解決公司內外的困境，亦因為他是香港人，擁有對海外業務發展及高度企管知識。令到公司能夠突破發展及公司股價由0．63美元升到突破72美元的奇迹。亦因為他太勞心勞力之故，此書作者最後寫道他在38歲之齡“因病殉職”了。
六年前，我正係為舊公司要開始向外拓展而奮戰，自己亦準備完成個大學畢業論文。忙到不可開交，跟本不曾想到自己會有因病殉職的事發生自己身上。但一兩年後，雖然公司開始有獲利，成為行內龍頭企業及亞太區頭百五名上市ＩＴ公司。自己亦畢業，除咗升職加薪（又加辛），仲擁有公司股及係公司key member。但有次搭車回家路程中，個心臟好似被拉扯的感覺，個人好辛苦。又成日好疲倦，想病又病唔出。一天睇到國內網站正是講網易的代理CEO孫德棣病逝，令我想起返聖經的金句：『人若賺得全世界，賠上自己的生命，有甚麼益處呢？人還能拿甚麼換生命呢？』（太16:26）我開始思考是否退落黎的了。
或者今天大多數朋友依然努力工作中，但我希望用孫先生的事蹟及本人的過去勸勉大家。人生還有可以更多工作，但不會亦不可為任何工作輕易賠上生命。尤其只為糊口之業，何需用上生命交換？！只要把工作做到無愧於心，亦向老闆有所交待（包括我們天上的老闆）。我想依然能夠把事情辦妥，甚至超過老闆所想所求。
身邊有幾位朋友都常常忙到去飲水都無時間，點都令我為他們擔心。希望他們可以有主的看顧，不要成為第二個”孫德棣”。

此誌寫於孫德棣先生的第六年死忌。

平凡中見偉大

Sun, 02 Jan 2011 15:41:45 +0000

係好多技術人才集結的ＩＴ產業，外面的人同行裏的人都認為呢行係以技術為主。但係其根本卻應該係以『人』為本。特別係團隊為主的技術項目，點樣做都無可能以為個技術人員係工廠機器裏嘅一粒縲絲，可以隨時更換！畢竟軟體工程的系統化離成功還差得遠，營造集體的智慧變成項目管理人要處理嘅首要任務喇。
記得係小廚仲係Ｍ記工作嘅時候，不管外面客戶定係老闆的要求，都帶畀我地團隊有莫大壓力。不斷需要我地提供高效率、品質優良及具創意嘅新Product & Service，簡直好用嘅野又有，做咗無人幫襯都有，連老闆都驚訝竟然我地做到啲幫公司賺錢又攞埋個獎嘅項目添！其實全因為我同個web designer加埋個程式設計師嘅三人團隊努力合作所得。而當中我地三個各盡其職、互相信賴、彼此尊重及合作，有完成項目的榮譽感以至成就自己。一直到我地各自分散之前，呢個團隊絕對係掌管住整間公司所有收入的主要動力。因此，我地既收入、地位同權力係隨公司發展一同成長啦。
但好多資源，例如budget、軟硬件裝備和時間，都隨時令我地做咗嘅項目，一夜化為烏有。亦因此，有啲項目含金量不足嘅話，我係唔多花時間處理，老闆又或者上司問起，我寧願解釋話其他野趕緊交貨，無時間做好就算咯。當然自己有牙力咁撑先可以咁做嘅，呵呵～但從中令我體會到團隊的高度互動，係可以發揮咁強大嘅凝聚力以至創造奇蹟。
可能我地每個人都各有不足之處，但只因大家剛好放啱咗位置，咪可以處理好項目各個細節。而身為經理人，就是要經營團隊的活力及熱情，令呢個團隊文化慢慢孕育成長，以至最終發展到偉大的團隊。(當然我無講我地團隊係地上最強喇，嘻嘻！)但能成就到呢個團隊嘅經理人，亦如伯樂一般咁難揾啦。
好似以前咁，教師先生都各有各專業，咁雖然受人尊敬，但好多時會被政府剝削。一次事件，卻能夠整合全港老師出黎爭取權益，隨即有位伯樂籍此機會建立一個具凝聚力的教師工會組織，呢個機構，就係位伯樂—司徒華先生所創的香港教育專業人員協會。到此時此刻，教協成為司徒華先生所驕傲的一生大事之一，希望他去到天父身邊，也能夠老懷安慰，一路走好。

點解要嫁個 I.T.男?

Sun, 05 Sep 2010 15:43:35 +0000

好耐都無寫文了，只因平時忙於更新公司裡不同軟件開發項目嘅進度，又要搞私幫生意，仲係一事無成嘅階段(一笑)，同埋將要係行大學畢業禮後揾啲野搞吓抖吓休息吓。所以放低無寫Blog一排，希望畀番些時間再黎寫過啦！
昨日睇到報紙有個疑似女人仔係文章寫嫁個I.T.男，好似講到呢家從事IT嘅男性自千禧年後，應該重新估計考慮作可追求對象。其實真係唔知笑佢白痴定係無知！？我真係唔明白佢究竟對女性心態瞭解幾多。
首先我講個朋友實例，佢係一個都幾高學歷(哲學碩士啫)嘅靚女，幾年前拍拖個位已經係IT男，但某原因分開咗。跟住無幾耐，又有一男性同咗佢一齊，原來個男仔係佢間公司做ＩＴ，其實係咪做呢行嘅男性特別吸引我個friend? 非也(何解我無行呢？)，只因佢認為個男有上進心、態度積極、人品好，當然個男性要好愛佢至得啦(呢個係我肥佬嘅原因，呵呵～_～)！咁佢就會細心考慮個男嘅追求。
好嘅女孩子選對象係好簡單，就係個男係對佢出自真心，想畀佢有安全感。個男做乜職業？who care! 千祈咪係從事不正當行業就得啦！咁追求女性係咪花好多錢？那就要睇個女仔愛你係基於乜啦！好似我另一個男性友人，佢位高權重，但追女仔又無乜用錢，個女仔仲有錢有屋多過佢。佢地既關係都幾親密添！因為裡面係好重要有愛的關連。
當愛情要建立於金錢、職業、身份地位等物質嘅野，這對情侶係唔可以叫情侶，佢地只可以係叫傾緊生意嘅生意拍檔。
嫁娶係我宗教信仰裏面，係最神聖嘅一部份。我相信找尋真愛，係可以付出一切。正如菲律賓人質事件裏，梁生為愛妻擋上致命嘅一槍…………….好相信呢啲就係地球裏，人類是萬物之靈的特性了。

技術最強的管理專才－程式經理

Sun, 25 Jul 2010 15:12:51 +0000

上次介紹咗專案主管(Project manager)同埋架構師，其實只係將兩樣不同職責分開，但不存在於邊個較重要。但真係項目夠大，就要安置一位管理兩方面的人物做統籌了。這就是程式經理(Program Manager)。
係微軟裡面，好多時要處理產品開發、檔案、測試及顧客滿意度，呢類未必係架構師可以抽空去做。但項目經理亦可能未必有能力解決。同樣道理，項目經理亦可能未必知道客戶及行銷人員對技術的難度作解答，架構師亦會提供過多既難處“嚇唬”佢地，咁身為世界最偉大既軟體企業，自然得安排此人既具技術强度，又加上善於溝通協調來監督每件事都確切做到，並要符合公司的期望。既要協調行銷人員、撰寫產品規格、常和產品支援小組共同合作Beta測試的種種事宜。並根據End user的feedback再研究如何改善產品。
程式經理必須成為從定義產品規格一直到軟件發行與行銷過程之間的橋樑，事務複雜又責任重大，職責包括：

設立產品的目標；

寫成產品的規格；

確立產品的開發過程；

決定規格的交換；

在產品開發小組中協調工作。
因此，程式經理自然大多是由程式設計師升遷上去，並且具有高能力人士才可勝任。又以微軟為例，Microsoft主要從大學畢業生招募回來，大部分程式經理都有技術性學士學位，有的有碩士學位。其餘只有少數是文科或企管碩士出身。對程式經理的訓練，更是要此人『一半學習、一半發明』，去學習如何做個有用的程式經理。
不過，除非間公司有微軟咁大，否則係香港，只係一個程式設計師處理晒。這是香港對軟件開發嘅唔重視，真可惜。但畢竟世界那麼大，香港亦可能有此人物。只係睇老闆重唔重視啫！

誰為轉工/行定分界？！

Sun, 20 Jun 2010 15:52:17 +0000

睇到一本叫《獵頭職場啟示錄》的書，其中內容就講到一個例子：
袁柔敏是零二年理工大學職業治療系畢業生，佢嫌治療師工作刻板，放棄咗二萬元人工而去中環高檔咖啡三文治店以六千月薪由低做起，掃地倒垃圾送外賣又擔又抬一腳踢。捱到一身腰酸背疼，但仲認為值得。又主動問上司表現如何，欠缺甚麼先至升到職，最終係零七年被獵頭公司邀其到麥當勞McCafe品牌經理做話事人。
當然睇到呢個例子並唔係要轉行去也。只係講咗兩樣野，一：讀果科並唔一定做番個行，如果真係讀果科做番果行，咁讀哲學係做乜好，咪話畀我聽中小學有哲學科教呀！二：只要興趣所在，不論閣下係名牌大學畢業或中學肆業，都係需要付出努力。
小廚唔係想講甚麼大道理或阿媽係女人的理論，只係自己都係人辦。小廚讀中一已經對電子遊戲有強烈興趣，甚至大到想寫隻受歡迎嘅遊戲。因此請教同學、師兄及老師，又揾書雜誌睇，才知道程式設計師係其中渴求及日本係呢個產業嘅源頭，咁就有學好理科及留學嘅打算。可惜我成績唔好入不了理科班，讀中六唔成去咗袋鼠國留學，自己都忘記了年輕時嘅夢想工作。但係，上天亦會係人生裏會畀番個機會人既，我上年剛從硬件大廠離職，正諗住可否全職用一個sem.讀埋個碩士課程，不到兩星期有間細小嘅手機內容開發商請左我，咁原來主力做手機遊戲開發。從中小廚學懂手機遊戲開發流程，也接觸到不同客戶、供應商及同行嘅商業行為。因此，不論主力做技術，抑或從事業務工作，我都相信自己有能力應付，加上係細個學生時嘅興趣工作，更加做得不亦樂乎。
但其中，”從硬件大廠離職”係我之前做手機內容及服務時轉行過去做硬件大廠，咁其實我係曾經「轉行」但失敗的人。我覺得轉行未必人人成功，際遇係其中要素，能力亦係一大原因。雖然我都係技術科班出身，但唔代表自己係其他電腦科技行業做得有成。如果真係非轉工或轉行不可，又有無好好仔細瞭解下自己性格及能力係可以做到啲乜呢？
書中有句問題真係幾值得去想：千萬不可把轉工轉行當作逃避，變成習慣，成為不願面對事實的藉口，遇上困難馬上撤退，而不是勇敢面對再想辦法克服解決。大家共勉之～

陪著你走

Sun, 06 Jun 2010 14:37:34 +0000

八年前，自己仲係個雙失青年，係真係揾唔到全職工作，大都係temp job或者係自己自求有收入既工作，做唔夠三個月就走。大學讀唔成，被人停學。係沙士黎臨的日子，科網股爆破的兩年找ＩＴ相關嘅工作，簡直何只難過駱駝穿過針眼，直頭難過去當選特首。
今日，完成了大學碩士課程(剛出成績，順利畢業)，也找到份其實都幾free嘅工，有個好好嘅女朋友。都算係神係過程中帶領我如何前行，因為知道我所信的是誰，也深信祂能保全我所交付祂的，直到那日。（提後 1:12）呢個係關鍵！同埋係咁多年認識到嘅朋友及家人支持，呢個亦係重要。
不管前路有幾艱巨，但係同一首歌名一樣：路‧一直都在。

(呢篇文係鼓勵富士康深圳廠房工作嘅年輕人，也為人生際遇裏過得不愉快的人打打氣。同行者，不止一個呢。)

一個ＩＴ主管的一天

Sun, 23 May 2010 14:05:38 +0000

我叫阿明，晉升咗Department Head 有八年了。我間公司係為各電訊商提供伺服器維護及更新，本人工作就係跟客戶提供意見，常常開會。亦要同員工溝通，電郵、MSN和QQ跟國內同事聯絡自然少不了。跟老闆匯報工作進度差不多花光了整個下午！加上請人工作，也令我頭大了，怕請錯人……所以做Debugging Test可減低風險吧。
今朝起身，牙都未擦完，個客戶的工程師打黎話冧機喎？！爆獲嗎？唔得閒諗，打個電話畀自己公司下屬，叫佢即時檢查。但無人聽…拿拿聲返公司先吧！
搭車其間，call到當值同事，佢話找到問題了，正shift咗IP，重新boot機。公司樓下買了老麥食，跟住返公司問佢情况如何？知道係Tomcat出事，問咗好多解決方法，個程式developer又話版本太舊、workload系統太重、連繫唔同住唔知乜野前人所寫既平台，唔可以停….搞到依家都只好維持住個死人系統。我話重新起個新既，大家異口同聲話好忙，無時間整…咁唔通我自己寫咩！？
客戶晨咁早派咗個人黎開會，話系統點解停咗成個鐘，唔通我話畀個客聽我地無錢及無時間整新系統，將你個service放咗係舊伺服器裏呀？咁咪要講平台workload及賴個客無提供對方平臺資料咁囉。好在個條友都唔太強技術又或潦解自身公司系統，否則按合約係要罰款的，老闆知道係我地問題就大不了罵，畀客知道睇怕要人頭落地了！開到成十一點半，個客先肯走。我先有時間覆Ｅ貓呢～食住早餐做野….
老闆返黎，知道又出事，捉咗我入房問長問短，我又解釋番系統唔穩，要畀錢買新機等老話題。老闆又避開話題講我地員工技術不好才致down機等等，咁都抝咗成個鐘，老闆叫我寫番份報告交待吓同提供解決方案。真係次次花幾個鐘寫啲咁嘅野真係好花時間！
二點正食完飯返黎就開始寫，寫到一半，個業務主管話要我陪佢去新客戶開會，咁我又拿起件西裝就出發，由觀塘去到青衣。上到客戶個office，要等人開完會。原來個白髮肥佬主席駕到，唔知佢老闆阿超人有無黎呢？
咁同個開會，傾咗九個字都只係得到，”我地會考慮下貴公司提議既合作模式，我地會開會傾吓再決定。”乜咁似見工架？！唉呀～大件事，有個人黎見工，我要飛奔返公司in人，一番到去，西裝未除就跟個客道晒歉，生怕佢見完工，上forum唱衰我。但個哥仔態度一般，個test成績一般。雖則外國名校畢業，但又唔講成績係點？有無summer工作經驗？一律欠奉。但送走左個哥仔後，睇番佢啲資歷，個post都係請Junior，算吧啦！就叫HR請佢，之後HR話打畀佢叫佢上班，佢話對份工無興趣，唔黎唷！……
差唔多六點十一先做完工作。放工歸家後，個客又打黎冧機。又要係家急call，我成八點都未食飯…

P.S.都係個句。如有雷同，實屬”撞手神”。

讀個ＩＴ碩士為乜先？！

Sun, 09 May 2010 13:26:53 +0000

呢排討論區都好興問讀電腦科學碩士既問題，真係唔知係咪同一個人！因為呢個問題有不少新手去問，但點解唔係同一個topic去問？佢地係咪唔識用forum?
如果唔識用，咁閣下唔駛讀乜鬼IT科Master囉～因為呢啲課程唔會教用forum，讀用你都唔會成為IT人〔或者自己都唔信自己係〕，咁不如留番啲錢同阿媽食餐勁正既自助餐，又或者去外國旅行。仲好過晒九萬蚊讀書(中大個MScITM要十萬大元添)啦。
我修咗個IT科嗰面的一科，主要係學點樣用Blog、Facebook、Twitter及Search Engine 優化去做推廣，課程得意得黎又可以聽阿Sir(佢係IT出身兼且有DBA既中小企老闆)的經驗之談。雖然唔算係好深既課程，但內容有好多啟發，令我建立到點樣為自家產品做宣傳。另外，識到啲Marketing Director同係中小企CIO既同學，真係一個擴闊人脈的機會。
敝校的IT碩士課程，有分Technical mainstream同埋business mainstream，同學可以根據自己能力修讀。其實學唔學到野係睇自己，係有本事，讀乜都可以有前途，無興趣，讀完醫科律師都轉行。
當然，好多科讀完得個讀字。例如我讀完都無得考牌，不過有牌考亦唔等如揾得多。因為主要係學理論居多，計數都多，但落手落腳做產品就無咁既機會lu~我諗我讀完都係教書就可，轉行就晒氣了…
講番正題，如果報IT Master又唔係技術個邊，讀完真係無乜可能做好high-tech嘅工作，只係令你懂得好多技術應用知識。但技術mainstream又可能唔夠數學底，亦好大機會無力勝任大啲既項目技術，咁係咪好值得讀呢？
錢多不如捐助有需要的人，自私啲既話，去食去玩左用掉就算，無謂日後攞到張證書就上forum呻笨～

回想‧這是天父世界

Sun, 25 Apr 2010 15:30:03 +0000

真係好忙，連功課考試一齊殺埋黎，加埋老闆要讓新項目上馬，真係好令人分身不暇。
本來以前做野同考試一齊都慣哂，預早完成功課同温習都好正常。只因今個sem讀一科，同埋呢科好似無太多理論要記。咁就無乜點温，但自從呢兩日睇番啲notes，先知咁多數據資料。真係又要臨急抱佛腳了～
雖然咁忙，去到圖書館除左温習，就係睇下有乜新書。睇到楊牧谷嘅新版舊作：這是天父世界－創造論初探，令我想起零壹年楊牧來到澳洲雪梨講道，真係好難得，亦令我真係可以見其真人。加上我的導師係楊牧師任教中大時的學生，我都算係佢徒孫！可惜楊牧師個次講道之後一年就病逝，算係神畀我可以真係學其寫文演講的機會吧。
講返本書，其實並唔係回應科學界進化論的挑戰而出現呢個新名詞。反之，係講解返人要睇番神的創造，先能從中修正我們人類扭曲咗既世界觀。使我們對神的作為及處世有正確的睇法。特別係受到大地震破壞生活的國內同胞，好畀我們重新反思自己對生命的看法，對大自然看到自己有無對其不負責任而受到強烈不安。睇番呢本書，係重整自己心靈既一個好方法。
希望就算呢排好忙，也能抽空睇到呢本書啦！

mobile 才是 web 3.0

Sun, 11 Apr 2010 15:59:46 +0000

最近放完長假，除左帶咗成班朋友同靚女們拍照同食飯，其他大部份時間都搞緊份Paper。其中都係集中寫社交媒體係mobile既發展。
有一日同朋友乘船返港講起買新手提電話，不論男女，都講得頭頭是道。我心諗，連女仔都咁識手機上網，相信日後越黎越多手機上網軟件及服務會出現。連Apple、google及Microsoft亦寸草必爭，可見得業界所吹嘅web 3.0，非Mobile莫屬了！
其實手提電話已經走向支援多媒體、影相功能及touch screen，變成為手提多媒體裝置。加上iPhone咁帶黎熱潮，令人特別係IT業界人仕開發mobile應用軟件及服務。
或者個人電腦嘅開發始終被各大跨國IT企業佔據山頭，新切入點機會有限。但手機軟件就始終係新藍海，並未有一間公司可以絕對寡頭地位，特別香港背靠中國內地，開發市場可以好大。據簡單資料，中移動下載遊戲收入比NDS及PSP遊戲收入多好多，甚至一年有成百萬收入。我想如果善用不同渠道，去國內以至國外發展，都係有意思。畢竟呢行係先插旗佔地盤為最重要。特別呢行係(手機)台大過(手機)廠，善用內容及策略，我地做內容／服務供應商都可以好揾錢。
越諗越多，我份Paper應該夠交貨啦啩？！