強記小廚’s 飯堂

六月 3, 2012

一個用戶的科技史(三)

Filed under: 生活點滴, 技術分享 — - @ 10:09 下午

有一日行經黃金某書店,係裏面睇吓書嘅時候,有一小學生帶埋個阿爸買書。個小弟弟就拉住阿爸問職員想學寫程式,問邊本書好,但職員問番佢想學乜程式語言,個小弟弟又答唔出乜嘢,只係話想寫程式。佢阿爸只好話等大啲至學,同時拉鬼走咗。雖然好搞笑,但畢竟“那些年”我也曾經“小學雞”過…
記得讀小學時,已經有同學參加電腦程式班。唔知點解,可能以前睇過『蘋果電腦』嘅廣告,所以也對電腦有興趣,亦唔知頭唔知路也想報讀程式班。可是阿媽以屋企無電腦,學黎無用為由否決小廚提議了。(估都估唔到依家竟以“學黎無用”嘅電腦程式為生…)
入中學嘅時候,發現咗有電腦班上。仲學咗第一個程式語言–LOGO!但以前玩黎玩去都唔明,呢啲野可以整到隻軟件出黎嘅咩!?其實呢個程式語言係教導我地程式的基礎實踐,就係一行指令一個動作。可惜堂堂都只係咁學搞指令,真係太無聊。於是有同學玩其他嘢及用Pascal寫程式了,中三時,有同學整咗隻賽車閃避遊戲了。自己也係暑期班報了電腦程式科,學咗啲Foxpro及C language。因此中五重讀時,夠薑加咗會考電腦科,仲要一個中五學期讀番哂中四中五嘅內容!幸好當時的電腦科老師批准我和我嘅朋友報讀,仲用下課時間補習番中四嘅內容和練習用Pascal寫程式添。好感謝老師嘅教導,自己努力也得到回報。係考Mock後,在理論果部份嘅成績竟然全班第一。呢個算係我人生中少數令人驚喜的回憶了。
但因為程式語言成績麻麻地,也令我無乜興趣走寫程式嘅發展路途。但依然係大專及大學報咗電腦程式設計科目,特別係大學時,JAVA發展快到令C及C++也不再係大學老師嘅教授內容。全面用哂JAVA,連學Data structure都要用Java講出實例。因此敝校學生可以強到用Java寫出搜尋引擎並被Google買咗其技術添!雖然那時候做coder真係唔係我杯茶,但有時不能不笑真係有主宰,到最後還是個程式員。
可能同我唔同,有位日本人比我更高一級,佢唔單只想設計程式,仲諗怎樣將程式語言用得更有效率又更輕鬆。呢位日本人–松本行弘就開發咗好出色嘅程式語言, Ruby~或者設計程式語言,絕對影響力大過用現有技術。佢嘅書,松本行弘的程式世界絕對比教科書更能啟發有志於從事程式設計的人。如果佢呢本出年十年,我都可能有唔同想法,至少寫程式對我來說已經係小蛋糕一件了(a piece of cake)。

五月 20, 2012

捉到老鼠才是好貓–論技術方法思考

Filed under: 生活點滴, 職業教育, 技術分享 — - @ 9:42 下午

由古至今,好多事情都有一定的程序、規則及方法。好似佛經裏提到佛祖教導如廁方法:自備廁籌(即木片),如果無,都唔好整係牆上及廁板上。亦不能用石頭、青草及軟木代替。並且解釋廁籌的長短制式,教導不能用彈、振及甩等方法弄乾淨。這個係釋迦牟尼佛傳落黎嘅“上廁用廁籌法”。
係工程論中,“過程論”的專家會要求按本子辦事,但係,如“上廁用廁籌法”,如果無可用的過程、方法及工具,係咪就蹲下去直到遇到有人借黎廁紙為止!?從中睇到工具的重要性,如果要現在上廁所,咁係咪堅持用木片而放棄用廁紙?
其實以上引用周愛民係《程序員》的文章嘅“自己想辨法”。
我想籍此講下,軟體工程亦講求【過程+方法+工具】,成日講用Java好過C#又或者新工具勝過某技術,都係一種對解決技術性問題嘅徧見。現在嘅技術越黎越多,而面對需求的量及質也不斷增加。以智能手機為例,十年前的技術,只係WAP或XHTML就可以搞定。3G也只係好初步,可以只需加上3GPP播片而己。但今時今日,平台都有好幾過,唔理啲少用戶平台,要同時做iOS及Android都唔少嘢吧。
係呢個不斷轉變嘅大環境,絕對需要將軟體工程發揮出黎,先至係解決問題的致勝之道。所以如果再係講技術嘅比較而爭拗,不如分享邊種問題可以被某方法解決更有意思~

p.s.學習不只是生活一部份,直頭生存嘅重要部份。試問有誰不用受教育就有成就呢?!做IT呢行,更應該試學習為自我能力嘅建立呢。

五月 6, 2012

一個用戶的科技史(二)

Filed under: 生活點滴, 技術分享 — - @ 10:44 下午

星期五晚去咗行『黃金』,行咗入某商場嘅賣大陸書嘅店舖。發現咗今個月新出的【程序員】雜誌,突然好想賣黎睇,於是俾低錢賣本走。嘩!睇咗個目錄,再睇內容…超正!呢兩日行開行埋,出街或上廁所都誌不離手。
都係因為內容技術含量極高,而且作者唔係國內科技公司的架構師,都係中科院的博士級技術專家。用番國內術語,呢本雜誌係技術“大牛”的期刋。相比起本地嘅電腦科技“消閒”雜誌,呢本技術專業雜誌的市場就窄得多了。
記得以前睇過本【電腦時代】,內容也好深。曾經教過如何hack個BBS,都幾怪。曾經去申請個資料研究嘅職位,佢電郵咗個一篇關於防火牆硬體的報紙,要我寫篇五百字的文章介紹吓個產品。但呢個產品係未出的,上網亦無介紹呢個產品!可見呢本雜誌曾經好高含金量,可惜唔知點解內容每況愈下。係咪跟住時代轉變中。
其實以前讀中學,星期四放學會跑到落黃金腦場攞本【電腦廣場】,貪佢唔駛錢又講吓本地電腦新消息。外國電腦雜誌睇過【PC Magazine】,但內容較普通,廣告又多。仲睇過某專欄作者讚某某產品,後面有專欄作者踩另一個競爭對手的產品。令我以後唔睇呢本廣告雜誌。之後睇《Byte》雜誌,內容較高端得多,可惜係無通告的情況下停刋。而【電腦廣場】開始要俾錢買嘅時候,我都無乜點再睇了。
其實到大學的時期,開始睇外國比較高學術性的文章,如IEEE的《Computer》雜誌,另外會買台灣嘅【Run!PC】。反而,國內嘅電腦雜誌仲未有認識,可能自己唔知國內嘅電腦新聞及知識有幾高水準。一直到某日上深圳,亦係首次踏足大陸跟朋友去見識吓。見到深圳書城放咗好多電腦書,雖然係不少疑似盜版,但不少係外國的神級電腦程式設計師嘅作品。不少人買添,我睇咗本Tom DeMarco嘅【最後期限】(The Deadline A Novel About Project Management)的譯本。只賣四十蚊港紙,唔買走寶。跟住見到本疑似電腦雜誌,一睇,竟然係介紹某公司嘅CPU結構!真係嘩咗聲。可惜能力不足,未敢買黎睇。但竟然國內有人出呢啲知識嘅雜誌,可見其讀者群技術能力不低。
有時心諗,真係好想香港有本好似【程序員】嘅雜誌。可惜,香港IT人才斷層,睇得明或懂得高科技嘅讀者,無辦法支持呢啲雜誌出到一年。咁北望神州(嘅雜誌)係我最佳(讀物)之選。

四月 30, 2012

一個用戶的科技史(一)

Filed under: 生活點滴, 校園體驗 — - @ 10:13 下午

最近買咗部新Notebook電腦,真係輕到連歲零的小女孩都可以拿起轉黎轉去。(最擔心不是小女孩或我,而是小女孩嘅父母)功能及物料質素之高也是比較良好,就算拎出街去coffee shop用wifi都較方便。
回想起多年之前入大學,在外國住係親戚屋企,都只係用大機(Desktop)。上網也會用modem,當佔線時,也只求不要打電話黎,因為會斷線的。有次回港過暑假,覺得霸住親戚的電腦好唔方便人,又要用部腦全天候做功課。因此要回大學之前買部手提電腦去用。去咗黃金高登轉咗一個圈,決定買部乳牛盒牌All-in-one手提電腦。當時如果連埋個火牛及多隻CD放入電腦袋,真係重到舉啞鈴咁上機。但以前已經覺得好型好方便的了,因為我的身邊同學,係會抬部大機上飛機運去的……
但係,上網就煩了。因為我房間係下層,又要電話線係大廳。於是去電腦店買咗超長的cable,由廳沿牆邊放到落樓梯再穿入我間房,真係大工程到暈。如果唔係吓吓用電郵及玩ICQ,真係唔要咁上網。
以前有網吧,但唔多亦唔方便,於是上網大多在家或在大學裏。大學啲機慢不在話,更有多人常常霸住用。所以唔多係度用,除非做group project。大家玩的主要是聊天網站及ICQ,雖然功能有限,但可以同遠在海外的親友溝通,係非常正的經歷了。好似跟在美國的老同學係九一一翌日聯絡上報平安,開始知道高科技係能夠幫到人的工具,感覺自己選擇修讀電腦科學是對的。
依家諗番以前科技還在發展,沙石不少。但畢竟係當時黎講,好過再之前的留學生寫信、打字機及電話通訊了。依家科技發達及方便,真係好多工程師及設計家不斷創新科技而出現。所以今日自己成為工程人員,也努力為人們未來生活改善而努力。
“工欲善其事,必先利其器”,買部貴啲嘅工具做嘢,都係好事黎嘅。
p.s.講起工具,下次會講吓讀書時所學到的當時技術,會分析及懷念一些不錯的工具~

四月 22, 2012

我還是程式設計師

Filed under: 職業教育, 技術分享 — - @ 11:05 下午

當以為自己對項目管理及軟體開發流程有研究,發現自己對程式語言、工具應用等開發基礎已經流失了。更重要係,自己太早開始做項目管理的工作,忘記咗揼石仔的基本知識。

約翰·卡馬克是個不折不扣的電腦宅男,他自從中學時期就懂得用Apple II寫程式來整蠱別人。當佢被當時開始係電子遊戲界闖出名堂嘅John Romero發掘,卡馬克加入咗佢地團隊,並且主力開發遊戲引擎。之後,佢地想到一隻遊戲應該如何以第一身模擬去俾人一種強烈投入的感受,因此,由Romero領軍,卡馬克主力程式開發,再加入多名日後都成為遊戲界名人的Tom Hall、Mark Rein、Sandy Petersen等一齊開發呢隻遊戲。

卡馬克知道以前有隻電腦遊戲~捉鬼敢死隊用過一隻第一身玩法,於是利用呢個基礎,再用碎型數學模型,把畫面做到不對稱,加強空間感。製作一隻(偽)3D遊戲引擎,以此開發咗名噪一時的電腦遊戲:DOOM。

之後卡馬克還是以程式設計師及技術總監等位置不斷開發Quake、Orcs & Elves等遊戲,他雖然貴為公司創辦人,管理公司嘅同時亦不忘對高端遊戲技術嘅追求,仲依然以developer身分開發新遊戲,及支持Open source項目的持續發展。因此,佢上年係遊戲開發者會議中獲得終身成就獎,以表揚佢對事業的全程投入。

從中啟發到小廚,覺得自己對好多技術都力不從心,也知道自己唔係仲有精力的時候,好好把程式技術運用得合宜,讓自己踏實啲,會把自己變成沒有技術嘅管理人,非技術專家。因此,決定入某工程師導向嘅大公司,成為一名工程師。由基礎嘢做起,當係對自己嘅一種磨練,亦希望繼續對技術追求嘅一團火燃燒下去。

九月 18, 2011

未得到世界需賠上生命麼?

Filed under: 生活點滴, 信仰心得 — - @ 10:52 下午

對國內的IT界名人傳奇毫不興趣,一黎每個名人主角都是一樣性格:內向、聰明、有自信但和藹、低調又謙恭,好似馬雲、丁磊、柳傳志同馬化騰都係同一個人咁。二黎對佢地創業模式不大認同。但最近有本新書,講丁磊的網易,令我有些感慨。而感慨的人是曾在丁磊下台而網易正被停牌的困難時刻,走馬上任的代理CEO孫德棣先生。
佢勞心奮力解決公司內外的困境,亦因為他是香港人,擁有對海外業務發展及高度企管知識。令到公司能夠突破發展及公司股價由0.63美元升到突破72美元的奇迹。亦因為他太勞心勞力之故,此書作者最後寫道他在38歲之齡“因病殉職”了。
六年前,我正係為舊公司要開始向外拓展而奮戰,自己亦準備完成個大學畢業論文。忙到不可開交,跟本不曾想到自己會有因病殉職的事發生自己身上。但一兩年後,雖然公司開始有獲利,成為行內龍頭企業及亞太區頭百五名上市IT公司。自己亦畢業,除咗升職加薪(又加辛),仲擁有公司股及係公司key member。但有次搭車回家路程中,個心臟好似被拉扯的感覺,個人好辛苦。又成日好疲倦,想病又病唔出。一天睇到國內網站正是講網易的代理CEO孫德棣病逝,令我想起返聖經的金句:『人若賺得全世界,賠上自己的生命,有甚麼益處呢?人還能拿甚麼換生命呢?』(太16:26)我開始思考是否退落黎的了。
或者今天大多數朋友依然努力工作中,但我希望用孫先生的事蹟及本人的過去勸勉大家。人生還有可以更多工作,但不會亦不可為任何工作輕易賠上生命。尤其只為糊口之業,何需用上生命交換?!只要把工作做到無愧於心,亦向老闆有所交待(包括我們天上的老闆)。我想依然能夠把事情辦妥,甚至超過老闆所想所求。
身邊有幾位朋友都常常忙到去飲水都無時間,點都令我為他們擔心。希望他們可以有主的看顧,不要成為第二個"孫德棣"。

此誌寫於孫德棣先生的第六年死忌。

一月 2, 2011

平凡中見偉大

Filed under: 生活點滴, 職業教育 — - @ 11:41 下午

係好多技術人才集結的IT產業,外面的人同行裏的人都認為呢行係以技術為主。但係其根本卻應該係以『人』為本。特別係團隊為主的技術項目,點樣做都無可能以為個技術人員係工廠機器裏嘅一粒縲絲,可以隨時更換!畢竟軟體工程的系統化離成功還差得遠,營造集體的智慧變成項目管理人要處理嘅首要任務喇。
記得係小廚仲係M記工作嘅時候,不管外面客戶定係老闆的要求,都帶畀我地團隊有莫大壓力。不斷需要我地提供高效率、品質優良及具創意嘅新Product & Service,簡直好用嘅野又有,做咗無人幫襯都有,連老闆都驚訝竟然我地做到啲幫公司賺錢又攞埋個獎嘅項目添!其實全因為我同個web designer加埋個程式設計師嘅三人團隊努力合作所得。而當中我地三個各盡其職、互相信賴、彼此尊重及合作,有完成項目的榮譽感以至成就自己。一直到我地各自分散之前,呢個團隊絕對係掌管住整間公司所有收入的主要動力。因此,我地既收入、地位同權力係隨公司發展一同成長啦。
但好多資源,例如budget、軟硬件裝備和時間,都隨時令我地做咗嘅項目,一夜化為烏有。亦因此,有啲項目含金量不足嘅話,我係唔多花時間處理,老闆又或者上司問起,我寧願解釋話其他野趕緊交貨,無時間做好就算咯。當然自己有牙力咁撑先可以咁做嘅,呵呵~但從中令我體會到團隊的高度互動,係可以發揮咁強大嘅凝聚力以至創造奇蹟。
可能我地每個人都各有不足之處,但只因大家剛好放啱咗位置,咪可以處理好項目各個細節。而身為經理人,就是要經營團隊的活力及熱情,令呢個團隊文化慢慢孕育成長,以至最終發展到偉大的團隊。(當然我無講我地團隊係地上最強喇,嘻嘻!)但能成就到呢個團隊嘅經理人,亦如伯樂一般咁難揾啦。
好似以前咁,教師先生都各有各專業,咁雖然受人尊敬,但好多時會被政府剝削。一次事件,卻能夠整合全港老師出黎爭取權益,隨即有位伯樂籍此機會建立一個具凝聚力的教師工會組織,呢個機構,就係位伯樂—司徒華先生所創的香港教育專業人員協會。到此時此刻,教協成為司徒華先生所驕傲的一生大事之一,希望他去到天父身邊,也能夠老懷安慰,一路走好。

九月 5, 2010

點解要嫁個 I.T.男?

Filed under: 生活點滴, 信仰心得 — - @ 11:43 下午

好耐都無寫文了,只因平時忙於更新公司裡不同軟件開發項目嘅進度,又要搞私幫生意,仲係一事無成嘅階段(一笑),同埋將要係行大學畢業禮後揾啲野搞吓抖吓休息吓。所以放低無寫Blog一排,希望畀番些時間再黎寫過啦!
昨日睇到報紙有個疑似女人仔係文章寫嫁個I.T.男,好似講到呢家從事IT嘅男性自千禧年後,應該重新估計考慮作可追求對象。其實真係唔知笑佢白痴定係無知!?我真係唔明白佢究竟對女性心態瞭解幾多。
首先我講個朋友實例,佢係一個都幾高學歷(哲學碩士啫)嘅靚女,幾年前拍拖個位已經係IT男,但某原因分開咗。跟住無幾耐,又有一男性同咗佢一齊,原來個男仔係佢間公司做IT,其實係咪做呢行嘅男性特別吸引我個friend? 非也(何解我無行呢?),只因佢認為個男有上進心、態度積極、人品好,當然個男性要好愛佢至得啦(呢個係我肥佬嘅原因,呵呵~_~)!咁佢就會細心考慮個男嘅追求。
好嘅女孩子選對象係好簡單,就係個男係對佢出自真心,想畀佢有安全感。個男做乜職業?who care! 千祈咪係從事不正當行業就得啦!咁追求女性係咪花好多錢?那就要睇個女仔愛你係基於乜啦!好似我另一個男性友人,佢位高權重,但追女仔又無乜用錢,個女仔仲有錢有屋多過佢。佢地既關係都幾親密添!因為裡面係好重要有愛的關連。
當愛情要建立於金錢、職業、身份地位等物質嘅野,這對情侶係唔可以叫情侶,佢地只可以係叫傾緊生意嘅生意拍檔。
嫁娶係我宗教信仰裏面,係最神聖嘅一部份。我相信找尋真愛,係可以付出一切。正如菲律賓人質事件裏,梁生為愛妻擋上致命嘅一槍…………….好相信呢啲就係地球裏,人類是萬物之靈的特性了。

七月 25, 2010

技術最強的管理專才-程式經理

Filed under: 職業教育, 技術分享 — - @ 11:12 下午

上次介紹咗專案主管(Project manager)同埋架構師,其實只係將兩樣不同職責分開,但不存在於邊個較重要。但真係項目夠大,就要安置一位管理兩方面的人物做統籌了。這就是程式經理(Program Manager)。
係微軟裡面,好多時要處理產品開發、檔案、測試及顧客滿意度,呢類未必係架構師可以抽空去做。但項目經理亦可能未必有能力解決。同樣道理,項目經理亦可能未必知道客戶及行銷人員對技術的難度作解答,架構師亦會提供過多既難處“嚇唬”佢地,咁身為世界最偉大既軟體企業,自然得安排此人既具技術强度,又加上善於溝通協調來監督每件事都確切做到,並要符合公司的期望。既要協調行銷人員、撰寫產品規格、常和產品支援小組共同合作Beta測試的種種事宜。並根據End user的feedback再研究如何改善產品。
程式經理必須成為從定義產品規格一直到軟件發行與行銷過程之間的橋樑,事務複雜又責任重大,職責包括:

  • 設立產品的目標;
  • 寫成產品的規格;
  • 確立產品的開發過程;
  • 決定規格的交換;
  • 在產品開發小組中協調工作。
    因此,程式經理自然大多是由程式設計師升遷上去,並且具有高能力人士才可勝任。又以微軟為例,Microsoft主要從大學畢業生招募回來,大部分程式經理都有技術性學士學位,有的有碩士學位。其餘只有少數是文科或企管碩士出身。對程式經理的訓練,更是要此人『一半學習、一半發明』,去學習如何做個有用的程式經理。
    不過,除非間公司有微軟咁大,否則係香港,只係一個程式設計師處理晒。這是香港對軟件開發嘅唔重視,真可惜。但畢竟世界那麼大,香港亦可能有此人物。只係睇老闆重唔重視啫!

  • 六月 20, 2010

    誰為轉工/行定分界?!

    Filed under: 生活點滴, 職業教育 — - @ 11:52 下午

    睇到一本叫《獵頭職場啟示錄》的書,其中內容就講到一個例子:
    袁柔敏是零二年理工大學職業治療系畢業生,佢嫌治療師工作刻板,放棄咗二萬元人工而去中環高檔咖啡三文治店以六千月薪由低做起,掃地倒垃圾送外賣又擔又抬一腳踢。捱到一身腰酸背疼,但仲認為值得。又主動問上司表現如何,欠缺甚麼先至升到職,最終係零七年被獵頭公司邀其到麥當勞McCafe品牌經理做話事人。
    當然睇到呢個例子並唔係要轉行去也。只係講咗兩樣野,一:讀果科並唔一定做番個行,如果真係讀果科做番果行,咁讀哲學係做乜好,咪話畀我聽中小學有哲學科教呀!二:只要興趣所在,不論閣下係名牌大學畢業或中學肆業,都係需要付出努力。
    小廚唔係想講甚麼大道理或阿媽係女人的理論,只係自己都係人辦。小廚讀中一已經對電子遊戲有強烈興趣,甚至大到想寫隻受歡迎嘅遊戲。因此請教同學、師兄及老師,又揾書雜誌睇,才知道程式設計師係其中渴求及日本係呢個產業嘅源頭,咁就有學好理科及留學嘅打算。可惜我成績唔好入不了理科班,讀中六唔成去咗袋鼠國留學,自己都忘記了年輕時嘅夢想工作。但係,上天亦會係人生裏會畀番個機會人既,我上年剛從硬件大廠離職,正諗住可否全職用一個sem.讀埋個碩士課程,不到兩星期有間細小嘅手機內容開發商請左我,咁原來主力做手機遊戲開發。從中小廚學懂手機遊戲開發流程,也接觸到不同客戶、供應商及同行嘅商業行為。因此,不論主力做技術,抑或從事業務工作,我都相信自己有能力應付,加上係細個學生時嘅興趣工作,更加做得不亦樂乎。
    但其中,"從硬件大廠離職"係我之前做手機內容及服務時轉行過去做硬件大廠,咁其實我係曾經「轉行」但失敗的人。我覺得轉行未必人人成功,際遇係其中要素,能力亦係一大原因。雖然我都係技術科班出身,但唔代表自己係其他電腦科技行業做得有成。如果真係非轉工或轉行不可,又有無好好仔細瞭解下自己性格及能力係可以做到啲乜呢?
    書中有句問題真係幾值得去想:千萬不可把轉工轉行當作逃避,變成習慣,成為不願面對事實的藉口,遇上困難馬上撤退,而不是勇敢面對再想辦法克服解決。大家共勉之~

    Older Posts »

    在WordPress.com寫網誌.