強記小廚’s 飯堂

四月 26, 2009

也談管理

Filed under: 職業教育 — - @ 11:37 下午

係捱踢界裏面,好多時都有唔同Projects要處理。好多做得項目經理都係由資深技術專才升到做管理人的,咁好多時會遇到非技術性既事情去處理。例如追進度、搞人事、面對客戶責難及老闆逼供等,都未必係一個初任管理人既技術專家能應付得到。
咁其實如果做得管理人,好應該諗下睇書或上啲商業有關嘅課程去瞭解下呢個世界係點做。但小廚本身有個好好既教練去教我點處理,即係我上司。佢係公司主席之下三大高層之一,好多時佢會面對客戶嘅追交貨同埋跟老闆交代既工作要做。係小廚畢業之後,公司開始有好多發展項目,因為佢要多啲對外既事情要處理,於是內部嘅項目就決定交由我去負責。咁即係升左(其實叫做多咗野就真),好多時我要單獨見客、又要追供應商交貨、要逼人交進度。好難處理既,就會詢問吓上司點做。係過程中不斷學習,好似游水咁,要浸親過至會學識既。但上堂學理論,都係令自己睇多唔同方法嘅優點缺點。
有軟體工程界既“聖經”之稱,書名叫《人月神話》。係美國捱踢界好多資深技術專家所推崇的作品,因為作者Fred Brook曾經任開發IBM OS360既項目頭頭,之後轉入學術界做咗北卡箂大學既電腦糸創糸主任。佢係小廚對軟體工程既啟蒙老師,其中佢以醫院手術嘅人手分配為學習對象,另我印象深刻。簡單啲講,其實主項目負責人專注做技術層面嘅野,另外安排幫工做管理既任務。咁樣就能夠好好將事情辦好又無太多煩人事情打擾進度。於是我都將呢個方法用係工作上,成效其實都一般,但只是都係將管理既野交番過我到。因為好多野大家未遇過或無經驗處理。
雖然係咁,我有機會既時候都盡量學以致用,唔係點知行唔行得通?!當然,我都諗下究竟讀MBA係工作上會唔會幫得到呢?

四月 19, 2009

學店疑雲?!

Filed under: 生活點滴, 職業教育 — - @ 10:05 下午

睇左阿若老既Blog一排,佢講會計專業同埋大學教育都係寫得幾好嘅。咁啱今次若老寫野雞大學,同時《招職》嘅夏里巴都有講關於國外大學學位既認受性,咁我忍左好耐都忍唔住要表達下意見。
首先,小廚留學時已經同朋友都做個下升學顧問嘅兼職工作。都可以叫有啲知識,但都好多野唔多清楚學院背後運作。只好簡單講吓啦:
其實,好多大學學位既認受性,間間大學唔同,視乎你報個間大學做法。有大學只係睇下張畢業證書所持有大學係咪當地政府認受(當然畢業生成績要好)就可以報讀Post-graduate學位課程,亦有大學要求申請人報課程前應向本地教育部確認學歷合資格先至畀你申請。因此每個有志報讀更高學歴既人仕,可以根據本身條件同埋心儀嘅大學要求去報想報既課程。
有啲人會為求快又平,希望用最短既時間同最平嘅價錢讀哂大學課程畢業。但外間課程如天上繁星,好多人又無乜時間分析課程好壞而見啱就報,真係方便左騙子揾錢之途。雖然係咁,外間有些課程的確也有合質素既學位課程畀人報讀。以小廚為例,我因輟學而只有文憑卻無本地大學接收,只好揾本地機構同外國大學協辦既學位課程。係咁多間“公司”之中,某機構有提供個電腦科學學位課程。讀電腦其實係無需要乜野專業學會認可,有都唔似香港會計師公會咁有權威性。但呢個係有英國電腦學會承認,畢業後拿個會員證就有個捱踢界功能組別選民的資格(跟住就無乜鬼用…)。而且,查過提供課程嘅大學本身,雖排名中下游,但都算係正正經經既一間大學。加上個間機構係馬拉係辦私立大學,兼且提供獎學金畀學生出國留學(留學袋鼠國已經知道間機構了)。所時我就認為無問題就報讀,接下來畢業兼報本地大學嘅深造課程。
好多時問題出自外面啲人用歧視眼光對待我地呢類畢業生,有大公司、有本地大學同埋有專業學會等咁排斥我地。可能我地一樣要上堂、做group project、做畢業論文,但只因張證書唔同,待遇亦唔同。我無去亦永遠唔會去抱怨,只要做好本份,有本事的人,就算好似落後於人,亦能做出好成績出黎(但要畀別人多好多倍辛勞)。
講番大學學位認受性,夏里巴係專欄回應有朋友的朋友以帝國聖馬丁大學學位能夠被本地大學收左讀深造會計課程而感到驚訝,只係用“干卿底事”來回應是一絕。間大學有自己收生標準,真係唔會因閣下認為野雞大學就全人類要跟閣下“標準”的。即使好似某選委會委員,擰咗個正正式式既野雞大學博士文憑(小廚以前睇報紙講呢間大學被袋鼠國教育部除去評審資格),依然入咗本地大學讀研究生課程。可見唔同大學有好多令人估唔到既收生標準,最重要係將你把握到既機會好好珍惜,唔係就算收咗你,都未必有能力畢業。
對我黎講,我亦只係抱著感恩的心態去完成呢個碩士課程。希望得到更多既人認同自己能力,不是邊間大學既證書。

四月 14, 2009

工作夢

Filed under: 生活點滴 — - @ 11:57 下午

呢排唔知點解又諗自己如果畢到業入大企業做Management trainee或入Big4做Audit,咁我條路好行得多…最少可以有信心追女仔,或者有番啲儲蓄買樓。
唉,可惜命運弄人,從事夕陽工業之前,大學輟學後,係老麥做咗半年,申請幾百份工又無人約見。之後,做間IT服務公司唔夠七日就被炒。跟住入立德做QC,三個月後又離職。當時係"沙士"後第一份工…然後係渠務署做文員,就連大阿姐勸我轉工,因為無前途。之後才入咗M記通訊至叫穩定下來,係當中人工唔多但都幾辛苦,分分鐘段鐘計仲少過老麥。做咗幾年,我又讀完個兼讀學位。重算幫公司登上業界一哥,我職位算高又有stock option,但都頂唔順太辛苦而離職,現在邊打工邊計劃創業。重讀緊碩士班,一星期有兩晚要趕頭趕命去紅磡番學…
有時問下自己可唔可以重新黎過,但係人都知時間只會一天一天流走。過咗去既事業夢就只好算了,做好份工先至係實際。但失去咗既人同埋鬥志,可否就只好算吧呢?

四月 12, 2009

WordCamp in 科技園

Filed under: 生活點滴 — - @ 11:53 下午

今年Wordcamp首次係香港舉行,真係好難得嘅一次能夠跟WORDPRESS創辦人近距離接觸。Matt Mullenweg份人真係好好兼且有自信。或者這是中國人同西方人既內涵分別,又有幾多IT人好似Matt咁係讀政治出身丫?!
其實我開頭以為好多好深層嘅新技術開發的消息,但中段又有Blogger嘅介紹。咁樣又好似可以瞭解其他人用呢個WordPress既服務,都幾正~
反而我又無同其他Blog友交流,自顧行下參觀科技園。從中我細心思想呢度好特別,因為呢個地方,不論係咪高學歷、高技術嘅科研人員,以至技術型玩家,都能夠係呢度創業開公司。雖然科研文化唔係硬件配套齊全就搞掂,反之軟件方面都係較重要。
正如WordPress唔算高科技,但的確具有技術含量高的産品。我相信個硬件搞掂咗,而軟件方面(即人才)能夠有需求。都會令科技園有機會成為香港矽谷的。
自問自己都具科班出身,又專業資格。但自己又唔及人有創意,所以自己未必成為創辦人,只好努力同合作伙伴構思下新産品,儘力成為一個好經理人,令到成為有名氣的産品。

四月 5, 2009

超越Java

Filed under: 技術分享 — - @ 3:29 下午

當係某forum睇到人問邊啲程式好用,我都只係回應各取所需。因為唔同用途,都係需要唔同工具。豈不聽過"殺雞焉用牛刀"?!
以前讀書學揼code,都好希望學最強既工具,一黎可以一技傍身,二黎演吓野咁啦。但呢個世界不斷改變,工具嘅需求不斷提高,用途已經由個人網誌以至去到大型糸統嘅程式都好闊。咁我由中學去到大學以至出黎做野已經學咗十個以上程式語言,但到依家無樣精。
係做到PM,好多時面對唔同客有唔同要求,我地運用工具、軟件糸統及技術之多,直追好多IT跨國企業,咁我地攞左中國百大創新技術獎之一的確係實至名歸,哈哈…(自大發傻中)。發現不論工具幾好,點都有優點缺點。即使一百個特點有九十九個優點,其中一個缺點出現而極危害成個糸統,可能都會最後風險太高,都可能唔用。反之,工具幫助不大,但其中小小一段code能做到明顯效果,都會唔識學到識!因為我地睇既係要整個糸統而並不某部份功能。
好既程式技術可以做好份project,但點都會被新問題難倒,因此整個工程(software engineering)既流程先係做好份project既解決之道。

在WordPress.com寫網誌.