強記小廚’s 飯堂

七月 26, 2009

二十届書展

Filed under: 生活點滴 — - @ 11:24 下午

係度掙扎左好耐,終於都係去咗。為咗快入場,係七仔買定飛兼買支水,唔駛再去輪買飛。
入到場真係人山人海,為咗唔好浪費彈藥,行咗一團過場先。發現心水不多(唉~今日唔見模又賣哂啲寫真,雖然我唔會買)。去到上書局,見到梁家權同蔡東豪賣書,我身為二人“粉絲”,就買咗佢地既書兼攞簽名,梁家權就好好傾,但蔡生就好忙都無講野。之後好多出版商出既書都咁上下,無乜心水。但路過聯合見陳豪嘅咖啡書,我就買黎睇。
上去臺灣出版書商,竟然連教科書都有得買,睇黎臺灣書沒落都似。我又揾唔到有乜心水,只好放棄。去到基督教書籍區,行過一次都無心水。本黎睇到建道神學院嘅論文集,但我又未必有心(無神心?!)去睇,反而怕咗班推銷信用卡既人員,正在拒絕離開之際,睇到林本利既書,超正~咁今次真係大收穫。哈哈
但現在又好似因為無買個本《高科技創業聖經》而有些後悔,永遠無乜十全十美既事~

廣告

七月 19, 2009

學歴無用論?

Filed under: 生活點滴, 職業教育, 技術分享, 信仰心得 — - @ 10:37 下午

有一日我收到電話喎,話有人在Search Engine揾到我地小組既團員名單及E貓等資料。咁我又唔清唔楚,求其問人問下邊個放上網,打左畀傳道人,以為佢將主日學名單上載左。我又唔知點解上唔到網,我都要問人才知道點解決。我除左嚇左其他人之外,我都諗唔到自己係IT知識上差左!
其實自從離校後,我好多電腦編程技術都忘了,入M記通訊都係對電訊知識、video streaming Server同埋Mobile Application較知道多些,都唔算好叻。現在更加只懂顯示卡更新及資料,無話對此好有研究,頂多知道晶片名號。但係如果話好深奧的現有技術理論,好似訊息處理、加密技術、無線網絡(Wireless LAN)及甚麼多媒體人工辨識系統等却可以說略懂一二嘅。因為這些都是小廚係紅磚大學讀緊嘅課程。
最近有人認為入不了大學也可以有成就,入大學未必有用云云。有人引用亦舒的一句話回應:只有入到大學的人才能講大學是沒有用的。其實我所持的諗法,正正像上頭小廚對事情認知及處理一樣,即係話你可以係大學裏學到高深理論,而這些野未必即時可以係現時職場用得著。甚至可能要學新野而對一般知識有所忽略。正如有一位係美國麻省理工讀書的學生講,佢地學野像極用消防喉飲水一樣,學都未學得切,又有新野學咯。現實世界依舊是講求實際,你學識用光波整舊勁過藍芽嘅裝置,但老闆要求你只需用現有物料整舊新藍芽裝置。你話唔識整喎,咁個老闆咪大發雷霆,大鬧你無鬼用囉!
入到大學的確係要有目標,有人可能為沙紙、可能為學識、也可能為阿媽。在職場,好多野都講即時上手,好多人以大學畢業生為優先,但其實公司肯畀training,中、小學畢業嘅人才都可以做得到。但無可否認,人都是有學歴歧視,認為讀得學位越高(未必讀書較多),其人也越可攀上成功位置(其中有可能是讀書多但無學位的人)。但係,兩者都有共通之處,都係要勤奮、有毅力及肯學習。這樣才能讓你的人生有更大的空間發揮。
好似好多牧者咁,其實都幾高學歴,有些更是外國名校博士添,但都依舊孜孜不倦的學習聖經,只因自己想更明白信仰裏的奥秘,也為信眾對聖經有更多明白。最終嘅,只想做到榮神益人。
P.S. 呢排真係又忙番,但係都要好好玩下,調劑下生活架嗎。黎緊好多活動,正!我要玩~玩~玩呀~~

七月 5, 2009

科技第三春

Filed under: 技術分享 — - @ 11:05 下午

成日都好似無事忙咁,但都要啲時間陪女友既。行到葉壹堂,見到今期天下雜誌介紹張忠謀既第三春,真係令到我好有興趣買黎睇睇。搞到女友話幫我袋住我都話唔制!哈哈~
好多本地人都唔知張忠謀既大名,可能連做科研既本地精英都唔知佢係乜水。但係講到台積電,真係無乜邊個臺灣人未聽過佢個大名。因為佢係最早將半導體由美國引進去臺灣,有臺灣半導體教父之稱。佢個大名,就好似香港首富咁勁。
今期天下雜誌,講張忠謀重新執掌台積電既總執行長之位,並將佢接班人調去開發新項目。其接班人、即前執行長係叫蔡力行,雖然之前發生公司無薪假、裁員風波等,但佢依然令第二、三季公司業績好轉。能夠係金融海嘯既環境中,令呢個製造業公司每年都有業績增長,可見佢的確係張忠謀口中最優秀既經理人。咁係乜野項目要用執行長降班親自投入此項目?答案係太陽能電池同埋LED。
明白呢兩個產品既人都知,其實佢地都近乎成熟既產品。自日本公司係九四年成功開發最難製造既藍光LED後,已經跟住可以造白光LED,技術就跟住好似停止咗咁。太陽能電池係我既大學最強科目,連美帝麻省理工都比下去。所有相關專利,都由好似三星、飛利浦呢啲大企業擁有,以台積電來講,佢有太陽能專利權數量是全球第二,更次三星。咁點解台積電全力進入此兩個項目?原因有二:
第一,台積電既晶圓代工,有成長率下降既趨勢。因為造價越黎越平,君不見中芯係內地設廠並且平賣晶片,Intel亦不斷被技術瓶頸所限制,咁係降低產能既大環境下,半導體只好越賣越少。對台積電來講,獨沽一味只有走上絕路。第二,呢兩個產品,都同世界科技既路向–節能,有很大嘅關連。太陽能電池就知嘞,不用多講。LED就根據書本所講,可以用好少能量産生高亮度,係未來綠能産業既一個重要産品。(因為下個學期小廚會修讀LED,所以早啲睇咗教科書,嘻嘻~)根據Gartner預估,今年整體太陽能光電市場成長達二十四%,而LED路燈市場,據拓璞產業研究所評估,比去年高達一七八%成長。可見得將來各大科技公司會向綠色環保技術進軍,不止台積電,連intel同NVIDIA已經出産環保技術及節能架構。所以張忠謀既第三春,會係世界既新發展。難怪78歲都要重出江湖嘞!
咁香港呢個功利社會,政府更係睇到利益又跟住去搞,但係以揾快錢為生既港人,推崇「high tech楷野,low tech撈野」。真係好難相信可以做得到啲乜野出黎,要搞環保?同我整走我地對出既屏風樓至講啦!

在 WordPress.com 建立免費網站或網誌.