強記小廚’s 飯堂

十月 25, 2009

上班新景象

Filed under: 職業教育, 信仰心得 — - @ 11:18 下午

在新公司上班,除了要重新調較工作流程,也要調整心態。以前工作忙碌,真係唔多知道究竟幾時先可以收工的。但呢間公司要打咭,咁就知道可以幾時收工,我又住係新公司附近,上班可以不慌不忙,但因為大都是準時放工,好似時間多咗,都會係街上打個白鴿轉才歸家。新公司以開發新mobile遊戲及手機內容為業務,我就主要做項目營運工作。工作是沒有以前的多變及危機四伏,但都是我興趣的産品,感覺非常過癮。加上內地同事編程需時,我可以籍此空間做其他要事了。
其實係咁既工作環境,自己又無乜朋友,又無乜時間拍拖,又不熱衷於逛街購物,家裏各人各自揾食(即唔使我養),更早已對打機、新科技産品無甚興趣,你話有錢有時間的我可以做乜?無錯,我只有做兩樣野,花大錢的玩意,是持續進修。呢個玩意真係可以填滿了我大半時間及用了大半金錢,但以我資質平平,測驗成績又差,功課又唔多懂,真係可以將我的生命縮短。第二樣是投資,我早些時候就留意各類投資產物。但都希望可以唸下又有乜野可以投資,加上市道依然暢旺,希望可以留意多些,學習一下。
有時都奇怪自己這個年齢,應該努力發奮的時間。更是揾大錢的時機。自己反而在享受生活的每一刻,不爭競,又不要物質享受。但要明白工作是為糊口、為興趣定係為衪而作,真係應該好好去想。感謝主,衪讓我經歴不少事,試過留學至頂級學府,也失敗返港成為雙失,SARS期間令自己信心全失,幸好後來找到理想的工作,被重用以致成為重要一員,也完成學士學位並入讀碩士課程。我相信要經歴如此大、如此多,才要明白神的奇妙作為。明白自己要謙卑,不可自高。也不用自慚形穢,因為神要看人為寶貴。更重要的是相信神是引導者,只有引導者才會帶領人要去的地方,所以我都明白麥傳道為何因自己經歴而哭,他並不是為過去的事難過,是為衪的神蹟而感動到流淚。我真係希望眾弟兄姊妹們不要嘗這經歴的苦杯才明白主愛,像魯益師(C.S.Lewis)所言“平安時神用微細聲音向你説話。苦難時,神是用擴聲器提醒你。”
請閣下要提醒我的同時,你最好也檢試下自己的情況。咪鬼懶醒至得架!

十月 11, 2009

風吹走動

Filed under: 生活點滴, 職業教育 — - @ 9:52 下午

所謂人夾人緣,呢個世界真係唔係個個有相同諗法。你地以為我怪,我亦覺得你地出奇。好似有朝早咁,我同阿邊個講話有好工介紹,仲要係佢夢寐以求的"正" 工。點知佢話簽左新約,所以拒絕咗我嘅介紹!唔係嘛?咁又話好想做?如果真係咁正,賠番成個月人工都走喇!何況睇都未睇過。同樣,我將份 CareerTime畀另一個,希望佢真係能夠有所得著,早日成為上班一族。其實我都唔幻想佢會向我道謝,但都唔好講"我唔睇CareerTime揾工噃!有冇SCMP嘅Classified Post?" …無奈…
今年嘅市道好轉,雖然股市無咁火熱,令好多本來做好耐嘅崗位的人仕,都蠢蠢欲動。其實小廚以前都唔係太叻揾工,但因為見得多,問得多,都略知一二。咁就分享下自己的經驗喇。我地係網上面或一些教寫Resume嘅求職書裏,好多都係千篇一律。就我做法,好多時係根據公司嘅要求及自己的學歴經驗,將現成的十零個求職信範文交叉運用,咁就可以整理好一份合用的求職信。例如是初級職位,咁就按佢嘅要求,交待自己能力先,再補充學歴,略講過去工作經驗(義工或暑期工都可)。如略要經驗,自己相關工作經驗不多的工種,講自己學歴行頭(名校的話,可儘吹,如果不是,只需講學過相關的課),交待過去曾做工也跟呢份新工相似,能力只需表明勝任。著重實際工作經驗的要求的工種,先講自己過去工作跟這份新工很相近,略談能力可以點樣應付,學歴可一句帶過。但是如果是重量級工作,像投資銀行分析員或跨國集團見習經理,這些必需要經驗及高學歴,先亮出高學歴並略談學過相似工作範圍的知識,然之後講過去工作曾任過乜職位同做過令前公司有好處的光榮事績。最重要,不要寫長過一版紙,才是最難!
履歷表的寫法,根據我做法,不要畀相。因為除非選港男或港姐,無人有興趣睇你係點樣。並且傭主好易落入歧視條例的陷阱關係,大都未必見你或call你。另外,有點難度的是,乜人睇你履歷表,知道就更好。以我過去做挑選的做法,先睇工作經驗,如欠缺,睇學歴有無學過相似的技巧(hard technology或soft skill),我同事睇佢個Skill為主。所以你份履歷表,寫到畀閱讀者覺得你好合適,真係好大機會揾你見工。
見工就真係合眼緣,我前老細同我食飯時講過,佢請人係憑感覺,佢feel到你有心做,就會請你。因為佢都揾人睇過你的資料,都唔會有乜出錯。見你係確定你真人係點,有無心及有無火(老實講,火係見唔到,但可能feel到,但亦不會是真)。所以去到呢個階段,請自求多福。如大公司,可能有唔同甚麼test,乜乜測試,但都係個句,執生啦!
你問我現在份工怎樣,我都只係有運咁啱佢請人而我又剛離職。對我來説,都係好工難求,而我正好得著啫。嘻嘻~

友緣相遇

Filed under: 生活點滴, 校園體驗 — - @ 9:20 下午

呢排因為交group project,結識左一班同學,其實都係我黎讀書的一大原因。希望交到更多朋友,不是要利用(就是說善用友誼的我都唔鐘意),而係每個人背後的故事,都令我相信天父係他們人生方向是獨特而有意思。佢地大多做銷售,可能電腦知識不多。讀IS的多數文商科的人,所有野都好基本。所以,我嘅成績較佳。
但要pesentation就真係靠佢地啦,我頂多提供多一些技術性解釋及paperwork。係當中都好忙,有同學要捱更扺夜,但終於搞。可以專注做獨腳戲的EIE511 Lab report,唉!
除左學業上有人相助,事業上都唔錯。公司雖然我和同事間無乜溝通,但同事都好好人,好肯幫手。另外,現在拍檔都幾合拍,當然因為我地真係曾經合作無間地打過不同硬仗。我相信能夠有幸同佢地合作,係神另一安排。只是我地要比以前打更難的仗,我擔心仲得唔得!?唔…應該學主日講見證的劉國堅所講:唔好理啦,做好準備交畀神喇。
教會的弟兄姊妹,始終像同路人首歌一句,係靈命路途上的伙伴。能夠有幸相遇,都算係神冥冥中的安排。不論係誰,大家都係我憂傷時的同伴,對嗎?
當然,對我而言,不用多,有佢一個,就夠了。咁悶嘅戲,都同我去睇。應該都無乜人架囉。

十月 3, 2009

突破框框

Filed under: 生活點滴, 職業教育 — - @ 11:53 下午

記得我上司講過佢地係開荒之初,為咗要攪呢個項目,佢地揾人上黎公司開課上點用M$ Project!但之後佢地係執行項目既時候,先至知個軟件係佢地用唔著。因為管理項目最難的,係人而唔係進度。
咁其實自己都成日聽到香港人管理大陸人都有啲困難,但我希望係我內地同事嘅工作中,睇下佢地點管理番自己同事?!我發覺佢地都會用惡嘅態度去帶佢地做野,雖然係做到啲,但香港人點會同佢地嘈生晒丫!
另一方面,外國人做野慢已經好多人都知,但真係佢地可以唔理別人已經講好嘅進度,連老闆都只好無奈接受。我成日諗,如果畀著前公司老闆,早就同人地既CEO投訴啦。但咁樣令我地少好多壓力…
雖然新工作距離達標還有段距離,但就畀到我有好大發展空間。加上我就快出年中就畢業,令我更加要發力前進。
廣告大師Leo Burnett曾說:「Reach for the star, you won’t end up with a handful of mud.」應該係我今年既座右銘了。

在 WordPress.com 建立免費網站或網誌.