強記小廚’s 飯堂

十二月 27, 2009

職場反思

Filed under: 生活點滴, 信仰心得 — - @ 11:22 下午

記得當正式離開M記,好似所有工作壓力都放下,但係因為唔知係咪咁,返而得了大病。一連四日都未曾好返,何姑娘以為我得閒,想我做乜做乜。而我只想倒在床上養病啫。
每個在香港生活的青年才俊,都希望坐在維港景旁的窗口辦公座位,享受著公司的成果,在事業上爬上頂峰。但我卻在到達頂峰之前退下來,可能對某些人來說是可惜。我卻認同《時代論壇》的社長李錦洪所講,我們都在自願或不自願的情況下縛上工作的烈火戰車。不斷奔馳,欲罷不能。有人會選擇由快車道下去慢車道,但因著個人學歷、背景、能力、專業,跳個另一條車道也不易。就算繼續在快車道奔馳,儘管收入不少,但為了追趕市場的詭變,也一刻不能停下來,否則落得車毀人亡的下場。
做IT,尤其跟電訊有關的,真的是架著了火的火車一樣。每一分鐘都有競爭對手出新services, 客戶每隔短時間就會要求新野,雖然小廚正好負責了最大的及最賺錢的遊戲(Mobile Game)項目,公司成為全港最大的手機內容供應商,自己也得到相對的回報及靚靚窗口位。但是自己卻無閒情逸致看海景,也無心理會銀行戶口有沒有收入增加,因為我只掛心著工作,更加無理會別人的事情。
其實自己早知不健康的,但是可能為了能攀上事業高處,所以沒有計較。但近這半年到,有天看到某張相。我發覺動力全失了,自己好似架死火了的車,突然停下來。或者我都估唔到,我心裏竟是為此發奮,哈哈~真傻!
唔……好了,真的是解脫了。或許是自己的一廂情愿,但天父沒有讓我傻下去,帶我走出來。並且拿得了額外的報酬,讓我也有感恩。現在,只想好好讀書及休養身體,向著主所指示的人生的目的地進發。

十二月 20, 2009

香港的矽谷

Filed under: 生活點滴 — - @ 11:51 下午

經Bloggger推介及求職報專訪,我終於係拉記借左呢個i-banker兼作家:姸宇著作的"香港華爾街的孩子"。佢雖然係美國名牌大學畢業生,金融界專業人士,又有美滿婚姻。但並不似鳳凰衛視嘅曾子墨咁,一味講佢學業有幾叻,幫企業上市,之後做名主持兼亞媽利女郎(我睇咗引言就合埋咗本書再無睇下去了…﹞。姸宇佢道出佢所見所聞嘅同時,亦不時反省生活同工作嘅體會,也道出年輕人對前途的不確定及迷茫。同樣,小廚也有此體會。
當好多商界人仕、政府高官同埋IT界專業人士係二千年就香港應否建立好似矽谷的數碼港或科技園有好多爭論。對我而言,香港矽谷早以在八十年代係我住及長大的深水埗黃金商場誕生。雖然早期係想吸引附近既成衣批發商的,我記得細個時行黃金係有衫賣。但佢既位置更帶咗本來係鴨寮街嘅電子公司轉黎開鋪,剛好個人電腦引入黎香港,佢地帶到黃金售賣,加上附近有中電人在下班後會行過來光顧,好多人將黄金商場推介為電腦軟硬件集中地。
小廚中學已經接觸電腦,為咗交功課及上堂需要,學校要我地用軟磁碟做功課。第一次獨個兒買,有好多嘢唔識買,個陣時會問售貨員點用,通常都好明確解答。畀個覺得佢地真係pro同埋係專業玩家,唔係專業吹水員。人地會講黃金嘜,並唔係相對於IBM PC 或 MAC機,只係平價雜牌機。而係按客戶需要既電腦組合,係價廉物美既產品,日後成為香港著名品牌添!
這是已經二十多年前嘅事了,現在的黄金商場也是旅客購物的地點。但缺少咗以前一種玩而優則做的創業人情懷。讀電腦同入行,好大程度小廚係被此文化風氣吸引。到現在,我都希望開間店舗做電腦,未必有錢賺,但滿足自己心願。
香港中環現在依然係人們心目中的華爾街,佢地以金融專業、商界脈搏為中心。香港黃金商場,已經唔係人們心裏既矽谷了。佢已經成為過去嘅回憶,像英國殖民地嘅香港一樣。

十二月 14, 2009

IT前途在哪?!

Filed under: 生活點滴, 職業教育 — - @ 12:12 上午

當係討論區成日有人大講香港做資訊科技行業是沒前途的,搞軟體既人又沒錢,最多人做所謂IT工作只係在學校做技術支援等言論。真係為個班人悲哀,因為佢地只會看現況,唔會睇自己本身能力。
好多人以為自己識某一個程式語言,並且寫到曉飛。因為無人請,又無人畀高薪用佢,自覺懷才不遇起來。之後就大發怨言,恃住係網上無人知佢係乜水,就大踩此行業的不濟。其實最不濟係佢地,又要係呢行揾食,但又要媽媽叉叉。轉咗行,未清楚呢行發展,就只插呢行香港唔掂,快啲轉行云云。真係救命,做人最唔掂又最苦,又唔見佢地叫人同佢死咗去。在此真無聊!
其實技術人都應該最少懂得六至七隻程式語言,因為呢個用呢一個程式語言揼program,但其他公司未必會用。外國人也要成日學不同程式語言,可況香港技術人?!有錢既大企業更係用ASP.Net, C#.net等,無乜錢既中小企咪用Java, php囉。但呢啲人對其他技術無興趣,有些只係為錢做此行。仲夠膽將自己同外國人比較,真係坐井望天。
香港搞資訊科技行業,的確如張五常教授所言,缺乏文化土壤。但係,從本身基建來說,係發達國家水平。有高渗透率嘅手提電話用戶人數,本身香港同西方發達國家有相當高溝通數目。所以中小企以至大公司都會用大量資訊科技作生意渠道及平台。加上成本不太高,可以籍此免去中介人的費用。
如小廚嘅開廠朋友也開始下年發展網上銷售平台,對新技術有很保留既佢,都做咗好多資料收集,令佢也覺得有得做!可見得,資訊科技會慢慢地深化為商業必需品。連行政總裁兼作家–蔡東豪也認為當市場真係好轉,企業才發覺以前炒咗既IT部門係何等重要並急需要既時候,也正正可能該企業壽終正寢之時。
所以香港嘅資訊科技會係永遠需要,又唔能夠被cut走嘅一個行業!(你試下叫依家啲老闆唔用Internet丫啦,保證佢當你白痴,跟手丙你一鎚。)

p.s. 昨日香港足球真係創造傳奇一刻~羅傑承係居功厥偉,佢帶領港足入決賽,又畀六萬蚊頭等艙叫陳七(陳肇麒)由熱刺番黎坐陣。又畀陳七入咗一球追平,最完美結局係靠互射十二碼而奪得冠軍,真係令我地成班睇住電視都大聲高呼。所以我認為特首話昨日係佢今年最高興日子,除咗重點支持足球事業之外,應該畀個大紫菜勳章給羅傑承就最好啦。

十二月 6, 2009

在學工程師的生活

Filed under: 職業教育 — - @ 10:54 下午

其實現在自己都毫無目標,好似架無左舵的船咁,乜都唔想做。但係如果有啲野搞,如約人睇戲、食晚飯或打波,我又好鬼精神喎!其實自己玩性太強而已,好想揾人陪我玩是最好不過。發覺自己都好似沃茲尼克,雖則小廚並不像他的成就,發明蘋果電腦一號及二號、被稱為當世電子奇才及傳奇駭客。我所講的相似,是指對工程技術的看法及性情。

佢認為工程師不單只根據guideline或specification去動工,也應該要自己設計技巧及創意去豐富産品的功效。光纖之父高錕都講過話讀完工程課程後,並不是照所學的重做一次,而是要想出新方法去解決傳統所不能解決的問題。而沃茲認為,真正一流的工程師,也是一位藝術家,並且設計一些既實用又別人所做不出的產品。雖然小廚沒有甚麼高超的技術發明甚麼,但都希望將創意轉化為產品制作出來。

最近真係百無聊賴,上網看到一份招聘Post,是請系統工程師。send Email出去,竟然十分鐘到就致電畀我叫我見工,雖然人工不高及加上只是一個月合約。 但我都幾有興趣呀喎,或者只因可以有機會接觸IBM的高科技的吸引力啦!但願佢唔怕呢個仲讀緊資訊工程嘅學生工程師啦。哈哈~

p.s.唔……個套《保姆日記》都幾啱睇,我真係幾似個女主角。別人都提議離去,但因工作而來的感受,依舊做下去。真係只為做出點成果。有意思~

在 WordPress.com 建立免費網站或網誌.