強記小廚’s 飯堂

九月 18, 2011

未得到世界需賠上生命麼?

Filed under: 生活點滴, 信仰心得 — - @ 10:52 下午

對國內的IT界名人傳奇毫不興趣,一黎每個名人主角都是一樣性格:內向、聰明、有自信但和藹、低調又謙恭,好似馬雲、丁磊、柳傳志同馬化騰都係同一個人咁。二黎對佢地創業模式不大認同。但最近有本新書,講丁磊的網易,令我有些感慨。而感慨的人是曾在丁磊下台而網易正被停牌的困難時刻,走馬上任的代理CEO孫德棣先生。
佢勞心奮力解決公司內外的困境,亦因為他是香港人,擁有對海外業務發展及高度企管知識。令到公司能夠突破發展及公司股價由0.63美元升到突破72美元的奇迹。亦因為他太勞心勞力之故,此書作者最後寫道他在38歲之齡“因病殉職”了。
六年前,我正係為舊公司要開始向外拓展而奮戰,自己亦準備完成個大學畢業論文。忙到不可開交,跟本不曾想到自己會有因病殉職的事發生自己身上。但一兩年後,雖然公司開始有獲利,成為行內龍頭企業及亞太區頭百五名上市IT公司。自己亦畢業,除咗升職加薪(又加辛),仲擁有公司股及係公司key member。但有次搭車回家路程中,個心臟好似被拉扯的感覺,個人好辛苦。又成日好疲倦,想病又病唔出。一天睇到國內網站正是講網易的代理CEO孫德棣病逝,令我想起返聖經的金句:『人若賺得全世界,賠上自己的生命,有甚麼益處呢?人還能拿甚麼換生命呢?』(太16:26)我開始思考是否退落黎的了。
或者今天大多數朋友依然努力工作中,但我希望用孫先生的事蹟及本人的過去勸勉大家。人生還有可以更多工作,但不會亦不可為任何工作輕易賠上生命。尤其只為糊口之業,何需用上生命交換?!只要把工作做到無愧於心,亦向老闆有所交待(包括我們天上的老闆)。我想依然能夠把事情辦妥,甚至超過老闆所想所求。
身邊有幾位朋友都常常忙到去飲水都無時間,點都令我為他們擔心。希望他們可以有主的看顧,不要成為第二個"孫德棣"。

此誌寫於孫德棣先生的第六年死忌。

九月 5, 2010

點解要嫁個 I.T.男?

Filed under: 生活點滴, 信仰心得 — - @ 11:43 下午

好耐都無寫文了,只因平時忙於更新公司裡不同軟件開發項目嘅進度,又要搞私幫生意,仲係一事無成嘅階段(一笑),同埋將要係行大學畢業禮後揾啲野搞吓抖吓休息吓。所以放低無寫Blog一排,希望畀番些時間再黎寫過啦!
昨日睇到報紙有個疑似女人仔係文章寫嫁個I.T.男,好似講到呢家從事IT嘅男性自千禧年後,應該重新估計考慮作可追求對象。其實真係唔知笑佢白痴定係無知!?我真係唔明白佢究竟對女性心態瞭解幾多。
首先我講個朋友實例,佢係一個都幾高學歷(哲學碩士啫)嘅靚女,幾年前拍拖個位已經係IT男,但某原因分開咗。跟住無幾耐,又有一男性同咗佢一齊,原來個男仔係佢間公司做IT,其實係咪做呢行嘅男性特別吸引我個friend? 非也(何解我無行呢?),只因佢認為個男有上進心、態度積極、人品好,當然個男性要好愛佢至得啦(呢個係我肥佬嘅原因,呵呵~_~)!咁佢就會細心考慮個男嘅追求。
好嘅女孩子選對象係好簡單,就係個男係對佢出自真心,想畀佢有安全感。個男做乜職業?who care! 千祈咪係從事不正當行業就得啦!咁追求女性係咪花好多錢?那就要睇個女仔愛你係基於乜啦!好似我另一個男性友人,佢位高權重,但追女仔又無乜用錢,個女仔仲有錢有屋多過佢。佢地既關係都幾親密添!因為裡面係好重要有愛的關連。
當愛情要建立於金錢、職業、身份地位等物質嘅野,這對情侶係唔可以叫情侶,佢地只可以係叫傾緊生意嘅生意拍檔。
嫁娶係我宗教信仰裏面,係最神聖嘅一部份。我相信找尋真愛,係可以付出一切。正如菲律賓人質事件裏,梁生為愛妻擋上致命嘅一槍…………….好相信呢啲就係地球裏,人類是萬物之靈的特性了。

六月 6, 2010

陪著你走

Filed under: 生活點滴, 信仰心得 — - @ 10:37 下午

八年前,自己仲係個雙失青年,係真係揾唔到全職工作,大都係temp job或者係自己自求有收入既工作,做唔夠三個月就走。大學讀唔成,被人停學。係沙士黎臨的日子,科網股爆破的兩年找IT相關嘅工作,簡直何只難過駱駝穿過針眼,直頭難過去當選特首。
今日,完成了大學碩士課程(剛出成績,順利畢業),也找到份其實都幾free嘅工,有個好好嘅女朋友。都算係神係過程中帶領我如何前行,因為知道我所信的是誰,也深信祂能保全我所交付祂的,直到那日。(提後 1:12)呢個係關鍵!同埋係咁多年認識到嘅朋友及家人支持,呢個亦係重要。
不管前路有幾艱巨,但係同一首歌名一樣:路‧一直都在。

(呢篇文係鼓勵富士康深圳廠房工作嘅年輕人,也為人生際遇裏過得不愉快的人打打氣。同行者,不止一個呢。)

四月 25, 2010

回想‧這是天父世界

Filed under: 校園體驗, 信仰心得 — - @ 11:30 下午

真係好忙,連功課考試一齊殺埋黎,加埋老闆要讓新項目上馬,真係好令人分身不暇。
本來以前做野同考試一齊都慣哂,預早完成功課同温習都好正常。只因今個sem讀一科,同埋呢科好似無太多理論要記。咁就無乜點温,但自從呢兩日睇番啲notes,先知咁多數據資料。真係又要臨急抱佛腳了~
雖然咁忙,去到圖書館除左温習,就係睇下有乜新書。睇到楊牧谷嘅新版舊作:這是天父世界-創造論初探,令我想起零壹年楊牧來到澳洲雪梨講道,真係好難得,亦令我真係可以見其真人。加上我的導師係楊牧師任教中大時的學生,我都算係佢徒孫!可惜楊牧師個次講道之後一年就病逝,算係神畀我可以真係學其寫文演講的機會吧。
講返本書,其實並唔係回應科學界進化論的挑戰而出現呢個新名詞。反之,係講解返人要睇番神的創造,先能從中修正我們人類扭曲咗既世界觀。使我們對神的作為及處世有正確的睇法。特別係受到大地震破壞生活的國內同胞,好畀我們重新反思自己對生命的看法,對大自然看到自己有無對其不負責任而受到強烈不安。睇番呢本書,係重整自己心靈既一個好方法。
希望就算呢排好忙,也能抽空睇到呢本書啦!

十二月 27, 2009

職場反思

Filed under: 生活點滴, 信仰心得 — - @ 11:22 下午

記得當正式離開M記,好似所有工作壓力都放下,但係因為唔知係咪咁,返而得了大病。一連四日都未曾好返,何姑娘以為我得閒,想我做乜做乜。而我只想倒在床上養病啫。
每個在香港生活的青年才俊,都希望坐在維港景旁的窗口辦公座位,享受著公司的成果,在事業上爬上頂峰。但我卻在到達頂峰之前退下來,可能對某些人來說是可惜。我卻認同《時代論壇》的社長李錦洪所講,我們都在自願或不自願的情況下縛上工作的烈火戰車。不斷奔馳,欲罷不能。有人會選擇由快車道下去慢車道,但因著個人學歷、背景、能力、專業,跳個另一條車道也不易。就算繼續在快車道奔馳,儘管收入不少,但為了追趕市場的詭變,也一刻不能停下來,否則落得車毀人亡的下場。
做IT,尤其跟電訊有關的,真的是架著了火的火車一樣。每一分鐘都有競爭對手出新services, 客戶每隔短時間就會要求新野,雖然小廚正好負責了最大的及最賺錢的遊戲(Mobile Game)項目,公司成為全港最大的手機內容供應商,自己也得到相對的回報及靚靚窗口位。但是自己卻無閒情逸致看海景,也無心理會銀行戶口有沒有收入增加,因為我只掛心著工作,更加無理會別人的事情。
其實自己早知不健康的,但是可能為了能攀上事業高處,所以沒有計較。但近這半年到,有天看到某張相。我發覺動力全失了,自己好似架死火了的車,突然停下來。或者我都估唔到,我心裏竟是為此發奮,哈哈~真傻!
唔……好了,真的是解脫了。或許是自己的一廂情愿,但天父沒有讓我傻下去,帶我走出來。並且拿得了額外的報酬,讓我也有感恩。現在,只想好好讀書及休養身體,向著主所指示的人生的目的地進發。

十月 25, 2009

上班新景象

Filed under: 職業教育, 信仰心得 — - @ 11:18 下午

在新公司上班,除了要重新調較工作流程,也要調整心態。以前工作忙碌,真係唔多知道究竟幾時先可以收工的。但呢間公司要打咭,咁就知道可以幾時收工,我又住係新公司附近,上班可以不慌不忙,但因為大都是準時放工,好似時間多咗,都會係街上打個白鴿轉才歸家。新公司以開發新mobile遊戲及手機內容為業務,我就主要做項目營運工作。工作是沒有以前的多變及危機四伏,但都是我興趣的産品,感覺非常過癮。加上內地同事編程需時,我可以籍此空間做其他要事了。
其實係咁既工作環境,自己又無乜朋友,又無乜時間拍拖,又不熱衷於逛街購物,家裏各人各自揾食(即唔使我養),更早已對打機、新科技産品無甚興趣,你話有錢有時間的我可以做乜?無錯,我只有做兩樣野,花大錢的玩意,是持續進修。呢個玩意真係可以填滿了我大半時間及用了大半金錢,但以我資質平平,測驗成績又差,功課又唔多懂,真係可以將我的生命縮短。第二樣是投資,我早些時候就留意各類投資產物。但都希望可以唸下又有乜野可以投資,加上市道依然暢旺,希望可以留意多些,學習一下。
有時都奇怪自己這個年齢,應該努力發奮的時間。更是揾大錢的時機。自己反而在享受生活的每一刻,不爭競,又不要物質享受。但要明白工作是為糊口、為興趣定係為衪而作,真係應該好好去想。感謝主,衪讓我經歴不少事,試過留學至頂級學府,也失敗返港成為雙失,SARS期間令自己信心全失,幸好後來找到理想的工作,被重用以致成為重要一員,也完成學士學位並入讀碩士課程。我相信要經歴如此大、如此多,才要明白神的奇妙作為。明白自己要謙卑,不可自高。也不用自慚形穢,因為神要看人為寶貴。更重要的是相信神是引導者,只有引導者才會帶領人要去的地方,所以我都明白麥傳道為何因自己經歴而哭,他並不是為過去的事難過,是為衪的神蹟而感動到流淚。我真係希望眾弟兄姊妹們不要嘗這經歴的苦杯才明白主愛,像魯益師(C.S.Lewis)所言“平安時神用微細聲音向你説話。苦難時,神是用擴聲器提醒你。”
請閣下要提醒我的同時,你最好也檢試下自己的情況。咪鬼懶醒至得架!

八月 23, 2009

專注是態度

Filed under: 生活點滴, 信仰心得 — - @ 10:47 下午

原來不知不覺就到九月,我依希記得這個月是小廚十二年前決志信主的日子,真係時光飛逝。好似都唔係好記得點決志了,但好記得當時享受在主裏蒙福的歲月。並且不久的一年裏,也正式洗禮添。反而決定洗禮的心態就不太好,因為同一齊上洗禮班的時候,有一位姊妹也參加,咁我咪又參加囉!哈哈~(一個貌美如花,身材均匀,兼天才横溢的醫科生,並且以自己出色醫術去為主出去短宣。很難很難不讓小廚這市井之徒所傾慕……)不過,到面對正式要洗禮的前一夜,好像正受著魔鬼向主的指控。全日做野都心事重重,怕自己根本不配在衪面前承認是衪的兒子。但得到表姐的提醒,在當晚向主跪下禱告,也正式帶着主所賜的信心,正式受洗歸主了。
可能經歴多了,有時會懐疑別人會參加教會,特別一些好似都無乜特別目的嘅活動,有新朋友參加,跟住就被邀請返團契,返教會。自己會懐疑佢點解返教會嘅?!難道阿邊個同邊個講了福音,咁佢又即刻信主?定係主或福音以外的某些吸引力?但不知不覺之間,發覺了自己一個缺點,這個亦是我致命的弱點。就是保羅所説的"只有一件事"的專注力。
我唸自己在澳洲不能畢業的原因,是大學太多學科,攪到自己修埋一些唔知乜的科目,好似經濟學原理(受張五常鼓勵而進修),基礎化學(實驗室好玩),工程物理(教授好勁,曾幫我寫信申請入港大),數學通史(我導師的老師嘅老師是全世界所認識的學者–李約瑟),伽利略的科學與宗教哲學對談(英文差但要寫成千字論文都幾刺激架)等科目。反而自己的主修–電腦科學就一落千丈,以至畢不了業。反之係香港讀個些學院,因為只為拿學位,目的只有一個,又無啲額外科目,反而擔心的畢業論文也能合格完成。
當專注力唔夠,會被其他事物或心態所影響。但當專注主所施行大能的時候,正是神改變人心的時候,包括當事人及旁觀者。會責備自己軟弱及對福音的大能的不信任,但是神要提醒小廚好好focus衪的愛當中。留意並幫助神的兒女的成長,是小廚好好報答及回應主愛的工作。

p.s.為了懲罰自己,決定重讀電腦科學的經典"The Art of Computer Programming"。但是讀四本,每本都像牛津字典咁厚,不知點解,好似有種天旋地轉的感覺,想昏倒~

八月 9, 2009

巴別專案的省思

Filed under: 信仰心得 — - @ 11:40 下午

據<創世紀>的記載,巴別塔(tower of Babel)是人類繼諾亞方舟(Noah’s Ark)之後著手進行的第二大工程,然而,它也是第一個巨大的失敗工程。
巴別塔的故事寓意深遠,由不同的角度可以得到不同的啟示,但純粹是以工程專案的觀點來看巴別塔,有哪些管理上的教訓?巴別塔具有以下成功的條件嗎?
1. 明確目標?有。雖然這是痴心妄想,但遠在人類所能達到的極限之前,它就宣告失敗了。
2. 人力?多得很。
3. 材料?美索不達米亞(Mesopotamia)蘊藏著豐富的黏土和柏油。
4. 足夠的時間?也有。沒有任何證據顯示有時間上的限制。
5. 充分的技術?這不成問題。金字塔或圓錐形結構本身就很?定,可以很有效地分散壓力的負載,磚石建造技術顯然也很成熟,但這項工程早在達到技術的極限之前,就宣告失敗了。
為甚麼萬事皆備卻仍然失敗呢?是不是還缺少什麼?答案有二:溝通以及隨之而來的組織。人和人不能彼此交談,就無法合作,當合作失敗,工作就陷入停頓。從故事中可知,缺乏溝通將導致爭執、誤解、集體猜忌,很快地,整個團隊會分崩瓦解,各行其是。
p.s. 其實呢個只係聖經裏面其中一個引申去軟體工程既例子,聖經都可以用歴史事件既角度去畀到人反思,人只係不斷重覆犯同一個錯誤。

七月 19, 2009

學歴無用論?

Filed under: 生活點滴, 職業教育, 技術分享, 信仰心得 — - @ 10:37 下午

有一日我收到電話喎,話有人在Search Engine揾到我地小組既團員名單及E貓等資料。咁我又唔清唔楚,求其問人問下邊個放上網,打左畀傳道人,以為佢將主日學名單上載左。我又唔知點解上唔到網,我都要問人才知道點解決。我除左嚇左其他人之外,我都諗唔到自己係IT知識上差左!
其實自從離校後,我好多電腦編程技術都忘了,入M記通訊都係對電訊知識、video streaming Server同埋Mobile Application較知道多些,都唔算好叻。現在更加只懂顯示卡更新及資料,無話對此好有研究,頂多知道晶片名號。但係如果話好深奧的現有技術理論,好似訊息處理、加密技術、無線網絡(Wireless LAN)及甚麼多媒體人工辨識系統等却可以說略懂一二嘅。因為這些都是小廚係紅磚大學讀緊嘅課程。
最近有人認為入不了大學也可以有成就,入大學未必有用云云。有人引用亦舒的一句話回應:只有入到大學的人才能講大學是沒有用的。其實我所持的諗法,正正像上頭小廚對事情認知及處理一樣,即係話你可以係大學裏學到高深理論,而這些野未必即時可以係現時職場用得著。甚至可能要學新野而對一般知識有所忽略。正如有一位係美國麻省理工讀書的學生講,佢地學野像極用消防喉飲水一樣,學都未學得切,又有新野學咯。現實世界依舊是講求實際,你學識用光波整舊勁過藍芽嘅裝置,但老闆要求你只需用現有物料整舊新藍芽裝置。你話唔識整喎,咁個老闆咪大發雷霆,大鬧你無鬼用囉!
入到大學的確係要有目標,有人可能為沙紙、可能為學識、也可能為阿媽。在職場,好多野都講即時上手,好多人以大學畢業生為優先,但其實公司肯畀training,中、小學畢業嘅人才都可以做得到。但無可否認,人都是有學歴歧視,認為讀得學位越高(未必讀書較多),其人也越可攀上成功位置(其中有可能是讀書多但無學位的人)。但係,兩者都有共通之處,都係要勤奮、有毅力及肯學習。這樣才能讓你的人生有更大的空間發揮。
好似好多牧者咁,其實都幾高學歴,有些更是外國名校博士添,但都依舊孜孜不倦的學習聖經,只因自己想更明白信仰裏的奥秘,也為信眾對聖經有更多明白。最終嘅,只想做到榮神益人。
P.S. 呢排真係又忙番,但係都要好好玩下,調劑下生活架嗎。黎緊好多活動,正!我要玩~玩~玩呀~~

六月 28, 2009

一念之間

Filed under: 生活點滴, 信仰心得 — - @ 11:08 下午

今個星期出咗成績,得到兩個C+。可能上個學期簡咗兩科都幾難既,因此只係得到咁既成績。
有時都會諗,點解讀大學本科既時候,點讀都肥?!但係讀碩士課程,又要番工番學,都可以合格,都咪話唔驚!以基督徒既身份,應該有感恩的心,但係小廚成日感到不安,真怕大學查番小廚大學成績而重新評估我既入學資格。
雖然小廚係電腦科學系畢業,但自問對程式編寫真係無乜興趣。我上司突然黎問我要唔要幫手用C/C++寫tools,諗起事旦個兩個程式語言都好鬼煩(C lang唔係object oriented而C++用pointer太唔方便),要個放低咁多年無揼code既小廚整個tools出黎,簡直想死。
其實一路走來,都好懷疑自己係咪適合走電腦技術方面既職業。因為自己中學時係文科人,數學又差。鍾意煮野食多過砌機,望住啲code會頭痛。加上自己對係香港發展創新科技産業既目標有保留,懷疑我曾被停學是否上天知道呢行不易為。依然係呢行,只因曾經滄海難為水,也可能是天父有野要我留係到?!自己騙自己算吧。
畢竟,我依然希望成為有實力既工程師,開發新技術,並且出份paper,咁我都其實心滿意足囉。

Older Posts »

在WordPress.com寫網誌.