強記小廚’s 飯堂

五月 20, 2012

捉到老鼠才是好貓–論技術方法思考

Filed under: 生活點滴, 職業教育, 技術分享 — - @ 9:42 下午

由古至今,好多事情都有一定的程序、規則及方法。好似佛經裏提到佛祖教導如廁方法:自備廁籌(即木片),如果無,都唔好整係牆上及廁板上。亦不能用石頭、青草及軟木代替。並且解釋廁籌的長短制式,教導不能用彈、振及甩等方法弄乾淨。這個係釋迦牟尼佛傳落黎嘅“上廁用廁籌法”。
係工程論中,“過程論”的專家會要求按本子辦事,但係,如“上廁用廁籌法”,如果無可用的過程、方法及工具,係咪就蹲下去直到遇到有人借黎廁紙為止!?從中睇到工具的重要性,如果要現在上廁所,咁係咪堅持用木片而放棄用廁紙?
其實以上引用周愛民係《程序員》的文章嘅“自己想辨法”。
我想籍此講下,軟體工程亦講求【過程+方法+工具】,成日講用Java好過C#又或者新工具勝過某技術,都係一種對解決技術性問題嘅徧見。現在嘅技術越黎越多,而面對需求的量及質也不斷增加。以智能手機為例,十年前的技術,只係WAP或XHTML就可以搞定。3G也只係好初步,可以只需加上3GPP播片而己。但今時今日,平台都有好幾過,唔理啲少用戶平台,要同時做iOS及Android都唔少嘢吧。
係呢個不斷轉變嘅大環境,絕對需要將軟體工程發揮出黎,先至係解決問題的致勝之道。所以如果再係講技術嘅比較而爭拗,不如分享邊種問題可以被某方法解決更有意思~

p.s.學習不只是生活一部份,直頭生存嘅重要部份。試問有誰不用受教育就有成就呢?!做IT呢行,更應該試學習為自我能力嘅建立呢。

四月 22, 2012

我還是程式設計師

Filed under: 職業教育, 技術分享 — - @ 11:05 下午

當以為自己對項目管理及軟體開發流程有研究,發現自己對程式語言、工具應用等開發基礎已經流失了。更重要係,自己太早開始做項目管理的工作,忘記咗揼石仔的基本知識。

約翰·卡馬克是個不折不扣的電腦宅男,他自從中學時期就懂得用Apple II寫程式來整蠱別人。當佢被當時開始係電子遊戲界闖出名堂嘅John Romero發掘,卡馬克加入咗佢地團隊,並且主力開發遊戲引擎。之後,佢地想到一隻遊戲應該如何以第一身模擬去俾人一種強烈投入的感受,因此,由Romero領軍,卡馬克主力程式開發,再加入多名日後都成為遊戲界名人的Tom Hall、Mark Rein、Sandy Petersen等一齊開發呢隻遊戲。

卡馬克知道以前有隻電腦遊戲~捉鬼敢死隊用過一隻第一身玩法,於是利用呢個基礎,再用碎型數學模型,把畫面做到不對稱,加強空間感。製作一隻(偽)3D遊戲引擎,以此開發咗名噪一時的電腦遊戲:DOOM。

之後卡馬克還是以程式設計師及技術總監等位置不斷開發Quake、Orcs & Elves等遊戲,他雖然貴為公司創辦人,管理公司嘅同時亦不忘對高端遊戲技術嘅追求,仲依然以developer身分開發新遊戲,及支持Open source項目的持續發展。因此,佢上年係遊戲開發者會議中獲得終身成就獎,以表揚佢對事業的全程投入。

從中啟發到小廚,覺得自己對好多技術都力不從心,也知道自己唔係仲有精力的時候,好好把程式技術運用得合宜,讓自己踏實啲,會把自己變成沒有技術嘅管理人,非技術專家。因此,決定入某工程師導向嘅大公司,成為一名工程師。由基礎嘢做起,當係對自己嘅一種磨練,亦希望繼續對技術追求嘅一團火燃燒下去。

一月 2, 2011

平凡中見偉大

Filed under: 生活點滴, 職業教育 — - @ 11:41 下午

係好多技術人才集結的IT產業,外面的人同行裏的人都認為呢行係以技術為主。但係其根本卻應該係以『人』為本。特別係團隊為主的技術項目,點樣做都無可能以為個技術人員係工廠機器裏嘅一粒縲絲,可以隨時更換!畢竟軟體工程的系統化離成功還差得遠,營造集體的智慧變成項目管理人要處理嘅首要任務喇。
記得係小廚仲係M記工作嘅時候,不管外面客戶定係老闆的要求,都帶畀我地團隊有莫大壓力。不斷需要我地提供高效率、品質優良及具創意嘅新Product & Service,簡直好用嘅野又有,做咗無人幫襯都有,連老闆都驚訝竟然我地做到啲幫公司賺錢又攞埋個獎嘅項目添!其實全因為我同個web designer加埋個程式設計師嘅三人團隊努力合作所得。而當中我地三個各盡其職、互相信賴、彼此尊重及合作,有完成項目的榮譽感以至成就自己。一直到我地各自分散之前,呢個團隊絕對係掌管住整間公司所有收入的主要動力。因此,我地既收入、地位同權力係隨公司發展一同成長啦。
但好多資源,例如budget、軟硬件裝備和時間,都隨時令我地做咗嘅項目,一夜化為烏有。亦因此,有啲項目含金量不足嘅話,我係唔多花時間處理,老闆又或者上司問起,我寧願解釋話其他野趕緊交貨,無時間做好就算咯。當然自己有牙力咁撑先可以咁做嘅,呵呵~但從中令我體會到團隊的高度互動,係可以發揮咁強大嘅凝聚力以至創造奇蹟。
可能我地每個人都各有不足之處,但只因大家剛好放啱咗位置,咪可以處理好項目各個細節。而身為經理人,就是要經營團隊的活力及熱情,令呢個團隊文化慢慢孕育成長,以至最終發展到偉大的團隊。(當然我無講我地團隊係地上最強喇,嘻嘻!)但能成就到呢個團隊嘅經理人,亦如伯樂一般咁難揾啦。
好似以前咁,教師先生都各有各專業,咁雖然受人尊敬,但好多時會被政府剝削。一次事件,卻能夠整合全港老師出黎爭取權益,隨即有位伯樂籍此機會建立一個具凝聚力的教師工會組織,呢個機構,就係位伯樂—司徒華先生所創的香港教育專業人員協會。到此時此刻,教協成為司徒華先生所驕傲的一生大事之一,希望他去到天父身邊,也能夠老懷安慰,一路走好。

七月 25, 2010

技術最強的管理專才-程式經理

Filed under: 職業教育, 技術分享 — - @ 11:12 下午

上次介紹咗專案主管(Project manager)同埋架構師,其實只係將兩樣不同職責分開,但不存在於邊個較重要。但真係項目夠大,就要安置一位管理兩方面的人物做統籌了。這就是程式經理(Program Manager)。
係微軟裡面,好多時要處理產品開發、檔案、測試及顧客滿意度,呢類未必係架構師可以抽空去做。但項目經理亦可能未必有能力解決。同樣道理,項目經理亦可能未必知道客戶及行銷人員對技術的難度作解答,架構師亦會提供過多既難處“嚇唬”佢地,咁身為世界最偉大既軟體企業,自然得安排此人既具技術强度,又加上善於溝通協調來監督每件事都確切做到,並要符合公司的期望。既要協調行銷人員、撰寫產品規格、常和產品支援小組共同合作Beta測試的種種事宜。並根據End user的feedback再研究如何改善產品。
程式經理必須成為從定義產品規格一直到軟件發行與行銷過程之間的橋樑,事務複雜又責任重大,職責包括:

  • 設立產品的目標;
  • 寫成產品的規格;
  • 確立產品的開發過程;
  • 決定規格的交換;
  • 在產品開發小組中協調工作。
    因此,程式經理自然大多是由程式設計師升遷上去,並且具有高能力人士才可勝任。又以微軟為例,Microsoft主要從大學畢業生招募回來,大部分程式經理都有技術性學士學位,有的有碩士學位。其餘只有少數是文科或企管碩士出身。對程式經理的訓練,更是要此人『一半學習、一半發明』,去學習如何做個有用的程式經理。
    不過,除非間公司有微軟咁大,否則係香港,只係一個程式設計師處理晒。這是香港對軟件開發嘅唔重視,真可惜。但畢竟世界那麼大,香港亦可能有此人物。只係睇老闆重唔重視啫!

  • 六月 20, 2010

    誰為轉工/行定分界?!

    Filed under: 生活點滴, 職業教育 — - @ 11:52 下午

    睇到一本叫《獵頭職場啟示錄》的書,其中內容就講到一個例子:
    袁柔敏是零二年理工大學職業治療系畢業生,佢嫌治療師工作刻板,放棄咗二萬元人工而去中環高檔咖啡三文治店以六千月薪由低做起,掃地倒垃圾送外賣又擔又抬一腳踢。捱到一身腰酸背疼,但仲認為值得。又主動問上司表現如何,欠缺甚麼先至升到職,最終係零七年被獵頭公司邀其到麥當勞McCafe品牌經理做話事人。
    當然睇到呢個例子並唔係要轉行去也。只係講咗兩樣野,一:讀果科並唔一定做番個行,如果真係讀果科做番果行,咁讀哲學係做乜好,咪話畀我聽中小學有哲學科教呀!二:只要興趣所在,不論閣下係名牌大學畢業或中學肆業,都係需要付出努力。
    小廚唔係想講甚麼大道理或阿媽係女人的理論,只係自己都係人辦。小廚讀中一已經對電子遊戲有強烈興趣,甚至大到想寫隻受歡迎嘅遊戲。因此請教同學、師兄及老師,又揾書雜誌睇,才知道程式設計師係其中渴求及日本係呢個產業嘅源頭,咁就有學好理科及留學嘅打算。可惜我成績唔好入不了理科班,讀中六唔成去咗袋鼠國留學,自己都忘記了年輕時嘅夢想工作。但係,上天亦會係人生裏會畀番個機會人既,我上年剛從硬件大廠離職,正諗住可否全職用一個sem.讀埋個碩士課程,不到兩星期有間細小嘅手機內容開發商請左我,咁原來主力做手機遊戲開發。從中小廚學懂手機遊戲開發流程,也接觸到不同客戶、供應商及同行嘅商業行為。因此,不論主力做技術,抑或從事業務工作,我都相信自己有能力應付,加上係細個學生時嘅興趣工作,更加做得不亦樂乎。
    但其中,"從硬件大廠離職"係我之前做手機內容及服務時轉行過去做硬件大廠,咁其實我係曾經「轉行」但失敗的人。我覺得轉行未必人人成功,際遇係其中要素,能力亦係一大原因。雖然我都係技術科班出身,但唔代表自己係其他電腦科技行業做得有成。如果真係非轉工或轉行不可,又有無好好仔細瞭解下自己性格及能力係可以做到啲乜呢?
    書中有句問題真係幾值得去想:千萬不可把轉工轉行當作逃避,變成習慣,成為不願面對事實的藉口,遇上困難馬上撤退,而不是勇敢面對再想辦法克服解決。大家共勉之~

    五月 23, 2010

    一個IT主管的一天

    Filed under: 生活點滴, 職業教育 — - @ 10:05 下午

    我叫阿明,晉升咗Department Head 有八年了。我間公司係為各電訊商提供伺服器維護及更新,本人工作就係跟客戶提供意見,常常開會。亦要同員工溝通,電郵、MSN和QQ跟國內同事聯絡自然少不了。跟老闆匯報工作進度差不多花光了整個下午!加上請人工作,也令我頭大了,怕請錯人……所以做Debugging Test可減低風險吧。
    今朝起身,牙都未擦完,個客戶的工程師打黎話冧機喎?!爆獲嗎?唔得閒諗,打個電話畀自己公司下屬,叫佢即時檢查。但無人聽…拿拿聲返公司先吧!
    搭車其間,call到當值同事,佢話找到問題了,正shift咗IP,重新boot機。公司樓下買了老麥食,跟住返公司問佢情况如何?知道係Tomcat出事,問咗好多解決方法,個程式developer又話版本太舊、workload系統太重、連繫唔同住唔知乜野前人所寫既平台,唔可以停….搞到依家都只好維持住個死人系統。我話重新起個新既,大家異口同聲話好忙,無時間整…咁唔通我自己寫咩!?
    客戶晨咁早派咗個人黎開會,話系統點解停咗成個鐘,唔通我話畀個客聽我地無錢及無時間整新系統,將你個service放咗係舊伺服器裏呀?咁咪要講平台workload及賴個客無提供對方平臺資料咁囉。好在個條友都唔太強技術又或潦解自身公司系統,否則按合約係要罰款的,老闆知道係我地問題就大不了罵,畀客知道睇怕要人頭落地了!開到成十一點半,個客先肯走。我先有時間覆E貓呢~食住早餐做野….
    老闆返黎,知道又出事,捉咗我入房問長問短,我又解釋番系統唔穩,要畀錢買新機等老話題。老闆又避開話題講我地員工技術不好才致down機等等,咁都抝咗成個鐘,老闆叫我寫番份報告交待吓同提供解決方案。真係次次花幾個鐘寫啲咁嘅野真係好花時間!
    二點正食完飯返黎就開始寫,寫到一半,個業務主管話要我陪佢去新客戶開會,咁我又拿起件西裝就出發,由觀塘去到青衣。上到客戶個office,要等人開完會。原來個白髮肥佬主席駕到,唔知佢老闆阿超人有無黎呢?
    咁同個開會,傾咗九個字都只係得到,"我地會考慮下貴公司提議既合作模式,我地會開會傾吓再決定。"乜咁似見工架?!唉呀~大件事,有個人黎見工,我要飛奔返公司in人,一番到去,西裝未除就跟個客道晒歉,生怕佢見完工,上forum唱衰我。但個哥仔態度一般,個test成績一般。雖則外國名校畢業,但又唔講成績係點?有無summer工作經驗?一律欠奉。但送走左個哥仔後,睇番佢啲資歷,個post都係請Junior,算吧啦!就叫HR請佢,之後HR話打畀佢叫佢上班,佢話對份工無興趣,唔黎唷!……
    差唔多六點十一先做完工作。放工歸家後,個客又打黎冧機。又要係家急call,我成八點都未食飯…

    P.S.都係個句。如有雷同,實屬"撞手神"。

    五月 9, 2010

    讀個IT碩士為乜先?!

    Filed under: 職業教育, 校園體驗 — - @ 9:26 下午

    呢排討論區都好興問讀電腦科學碩士既問題,真係唔知係咪同一個人!因為呢個問題有不少新手去問,但點解唔係同一個topic去問?佢地係咪唔識用forum?
    如果唔識用,咁閣下唔駛讀乜鬼IT科Master囉~因為呢啲課程唔會教用forum,讀用你都唔會成為IT人〔或者自己都唔信自己係〕,咁不如留番啲錢同阿媽食餐勁正既自助餐,又或者去外國旅行。仲好過晒九萬蚊讀書(中大個MScITM要十萬大元添)啦。
    我修咗個IT科嗰面的一科,主要係學點樣用Blog、Facebook、Twitter及Search Engine 優化去做推廣,課程得意得黎又可以聽阿Sir(佢係IT出身兼且有DBA既中小企老闆)的經驗之談。雖然唔算係好深既課程,但內容有好多啟發,令我建立到點樣為自家產品做宣傳。另外,識到啲Marketing Director同係中小企CIO既同學,真係一個擴闊人脈的機會。
    敝校的IT碩士課程,有分Technical mainstream同埋business mainstream,同學可以根據自己能力修讀。其實學唔學到野係睇自己,係有本事,讀乜都可以有前途,無興趣,讀完醫科律師都轉行。
    當然,好多科讀完得個讀字。例如我讀完都無得考牌,不過有牌考亦唔等如揾得多。因為主要係學理論居多,計數都多,但落手落腳做產品就無咁既機會lu~我諗我讀完都係教書就可,轉行就晒氣了…
    講番正題,如果報IT Master又唔係技術個邊,讀完真係無乜可能做好high-tech嘅工作,只係令你懂得好多技術應用知識。但技術mainstream又可能唔夠數學底,亦好大機會無力勝任大啲既項目技術,咁係咪好值得讀呢?
    錢多不如捐助有需要的人,自私啲既話,去食去玩左用掉就算,無謂日後攞到張證書就上forum呻笨~

    四月 11, 2010

    mobile 才是 web 3.0

    Filed under: 職業教育, 技術分享 — - @ 11:59 下午

    最近放完長假,除左帶咗成班朋友同靚女們拍照同食飯,其他大部份時間都搞緊份Paper。其中都係集中寫社交媒體係mobile既發展。
    有一日同朋友乘船返港講起買新手提電話,不論男女,都講得頭頭是道。我心諗,連女仔都咁識手機上網,相信日後越黎越多手機上網軟件及服務會出現。連Apple、google及Microsoft亦寸草必爭,可見得業界所吹嘅web 3.0,非Mobile莫屬了!
    其實手提電話已經走向支援多媒體、影相功能及touch screen,變成為手提多媒體裝置。加上iPhone咁帶黎熱潮,令人特別係IT業界人仕開發mobile應用軟件及服務。
    或者個人電腦嘅開發始終被各大跨國IT企業佔據山頭,新切入點機會有限。但手機軟件就始終係新藍海,並未有一間公司可以絕對寡頭地位,特別香港背靠中國內地,開發市場可以好大。據簡單資料,中移動下載遊戲收入比NDS及PSP遊戲收入多好多,甚至一年有成百萬收入。我想如果善用不同渠道,去國內以至國外發展,都係有意思。畢竟呢行係先插旗佔地盤為最重要。特別呢行係(手機)台大過(手機)廠,善用內容及策略,我地做內容/服務供應商都可以好揾錢。
    越諗越多,我份Paper應該夠交貨啦啩?!

    三月 7, 2010

    PM唔易做

    Filed under: 職業教育, 技術分享 — - @ 11:30 下午

    不論國內各個聊天室,以至香島不同討論區,一講到係IT呢行工作,好多網友或淡友都成日講。如果到三十歲都升唔到項目經理(Project Manager或簡稱PM)呢個位,咁就係時候好轉公司或轉行喇。先唔講求職市場係咪有咁多PM嘅職位,但其實個人本身有無做PM既條件先至係值得討論!

    小廚以前某位同事,佢啲技術好專程式設計,但也懂得硬體裝配、網絡設置、以至係Game Engine都略知一二。佢寫既系統,既幫公司拿到專利,亦賺到不少錢,更厲害係攞咗本地及國內的獎項。雖然係咁,但都係只可升到系統分析員而已。其實佢係讀商業資訊管理,但就只係十足十既Geek仔,無乜同客講解能力。有時可能要好多因素顧及,但佢未必可能理解埋背後因素(例如個項目只係得個殻,唔駛去做…)。因此有時花咗無謂時間處理,俾人覺得似係缺乏時間管理既能力嘛!而另一方面,小廚需係電腦科學專業出身,但揼code能力極低,起個一個視頻系統之外,好少再處理好高端既技術了。份人又懶,不求完美,只要弄死不了個項目就把該項目close file了。但係,小廚就知道項目有不少野要做,例如:諗成個項目既解決方案、把客戶需要摸清楚(免得做完唔啱客用)、實施計劃(好似人手調配及工具準備)到項目測試/驗收等。我都各樣安排好。因此做咗兩年可以已經自己處理大項目了。

    講到呢度,其實不是比較我跟我同事既各能力誰勝孰劣,也不是想踩PM嘅職位並非平庸之輩不可任。只係想講PM就是有一個合同,需要我們這方派一個人來領導我們這方的人。譲佢和客戶方面的項目班子進行對接。双方平等協商,並不存在誰聽誰的。咁個PM駛唔駛好叻技術呢?其實只要懂得成個項目業務也可勝任,對自家軟件系統有深刻了解就可以了。半懂不懂的只亂糟糟咁去揾出問題根本哂時間,仲可能解決唔到個問題添。如果技術好叻,不如專心做系統/軟體設計分析吧,無謂把才幹錯配去跟個客胡扯哂時間。咁樣分分鐘仲多人工過PM呢~

    雖然依家我既同事做不了項目經理,但都成了公司系統架構師,人工頗高呢。相反自己轉咗小企的技術主管,但距離自己目標還遠呢。所以我到依家都唔知討論區嘅淡友所謂,三十歲之後的業內同工,升唔上PM嘅係轉咗份工,定係體會到專注不同新技術才是呢行出路呢?

    二月 28, 2010

    與熊共舞

    Filed under: 生活點滴, 職業教育, 技術分享 — - @ 11:39 下午

    最近真係頭都大埋,明明個項目都出咗街,但收入唔得,其原因頗多,畢竟每個項目都有佢既風險存在。如果有人夠膽仲講零風險,一係呢個項目係零收入,唔值得去得。一係就錯估可出現既情況發生。
    現在好多MBA嘅新興科目裏面,都會加入咗風險管理呢樣嘢。其實早在捱踢界嘅項目管理裏,早就有唔少書籍及文章講呢個題目架啦~
    其中湯姆‧狄馬克寫的"Waltzing with Bears – Managing Risk on Software porjects"就係一本經典之作。佢將好多人看風險係賭博一樣,總覺得"點可能發生係我地身上丫",因此項目管理人被死線(Deadline)及老闆所控制下,將項目定得死死,跟手只向住美好目標前進。因此項目出現一定數量問題時,PM不斷修正錯處,以至項目只好向其相反方向前行。其主因正是無咗風險管理既準備,錯失咗防止問題發生的機會。
    小廚處理緊嘅項目足足用了半年,只因上手花了不少時間原地踏步,我亦用咗成兩個月才解決早期所有問題。現在收入不高,有啲我預咗,因為用戶太過狹窄,二黎也因為老闆無仔細分析成個項目風險,所以先造成今日局面。
    希望求上天有好心之德,救我快啲甩身就好啦……
    其實諗諗下拍拖都有好大風險,遇著個好伴侶就話啫,遇到唔好就令自己日日悶悶不樂,但我又真係未聽過追女仔有風險管理喎~

    Older Posts »

    在WordPress.com寫網誌.